جیھل رئیسی , عیسی خان مبارکی ءُ امب

ھیچان ءِ کلات ءِ نزیک ءَ کوھن ءُ کدیمی امبے ھست کہ ھرکس ھیچان ءِ بادشاہ بوتگ اے امب بادشاہ ءِ بوتگ ,بزاں سرکاری امبے بوتگ . اے امب دنیگا ھست انت .امبِ ءِ پلّ کنوک ءُ سمبالوک رئیس بوتگ انت . منی پت جیھل ءَ گوشت امب رستگ ات ءُ گوادنزے بوتگ ات ءُ لھتے امب گوادنزءَ دور داتگ ات . من امب چت انت ءُ وتی لوگ ءَ برت انت کہ آ سال ءَ منی کٹم ءَ امب پلّ کتگ ات . منی پت یلی ءَ من ءَ گوشت او جیھُک عیسی خان ءِ سّڈ ءِ سرات زرتگ , امب ات چتگ ءُ آورتگ انت , ھما عیسی خان کہ آھرّانیانی شلواراں گربگ مان کتگ ,. ھما عیسیخان کہ کُلی ءِ دست پاد ءُ زبان بُرتّنت ءُ شگیمی ھمے ھیچان ءِ کلات ءَ داوت دات ءُ کشت انت . من پسہ دات منی پت ھرچی بیت بلیّ بیت نوں ھبر چہ ھلوت ءَ گوستگ , اے منی بھر بوتگ انت کہ من چتگ ءُ آووتگ انت بیا وتی دپ ءَ شیرکن کن ءُ واجہ پہ چار دانگ امب ءَ من ءَ نکشیت. باز دیر نگوستگ ات کہ باد شاہ ءِ سپاھیگ یارُک گوں دراجیں تپنگ ءَ زاھر بوت ءُگوشت جیھل ترا کلات ءَ لوٹ انت. من ءُ یارُک کلات ءَ سربوتیں , کلات ءِ بُرجُک ءَ واجہ ءِ دیوان ات . من سلام دات , منی علیک نگپت . من کرّے ءَ نشتاں . واجہءِ بروت کانٹ اتنت ءُ چپ ءُ راست ءَ سر سرینتگ ءُتاب داتگ ات . من وتی دل ءَ گوشت جیھل اگاں مرد بئے یا بگا آپ ءَ ترا برتگ. دمانے ءَ رند واجہ ءَ منی نیمگ ءَ چارت ءُ گوشت ; جیھل . من پسہ دات جی واجہ

جیھل ترا امب وشّ بیت؟ من پسہ ھو من ءَ امب وشّ بیت. جیھل ترا امب وشّ بیت ؟ من پدا پسہ دات من ءَ امب سّک وشّ بیت . سیمی رندا جست کت جیھل ترا امب وشّ بیت ؟ من پسہ دات ھو من ءَ امب وشّ بیت .گوشت ئے بگرات بدرنجت ئے . احمد شاہ کشیگی کہ آئی ءِ پوج ءِ کمانڈر ات ءُ ھما دیوان ءَ نشتگ ات ءُ منی گھارءِ سانگ کتگ ات پسہ دات : واجہ پسے نہ انت کہ درنج ئے . ملام ئے بکن . واجہءَ گوشت تو گوشئے ملام , یک ھزار کُرش ملام انت.من پاداتکاں ءُ لوگ ءَشتاں .ایدگہ سھب ءَ یارُک ءَ تپنگ زمین ءَ جت ءُ مئی لوگ ءِ دپ ءَ نشت ءُ دانکہ سے روچ ءَ یکھزار کُرش. وھدیکہ روچ نشت ءُ یارک شت ما سجئیں سے شپ ءَ توشگ نا ءُ دانے ھست ات ھراں لڈّ ات انت ءُ کورکان ءِ کڈّاں ایر کت انت ءُ سیمی روچ ءِ بیگاہ ءَ گوں یارک ءَ گوشت باندات ھزار کرش ءَ کاراں . وھدیکہ یارک ءَ پشت مان دات من گوں وتی کٹم ءَ دیم پہ بِنت ءَ سرگپتیں .ءُ بنت ءِ بادشاہ ایوب خان ءِ میار بوتیں . ایوب خان ءَ مارا وشاتک گوشت لوگ ءُ جاگہ دات ءُ ورد ءُ وراک ءِ بند ءُ بست . ایوب ءَ گوشت عیسی خان شمارا نیم چمّی چارت نکنت. من ءَ ایوب خان مَگش ات ,من ایوباں . مدتّے ءَ رند عیسی خان ءَ ھیچانی کماش دیم دات انت ءُ مااش پدا ھیچان ءَ آورت ءُ ما ھزار کرش ندات