لال بکش جھانشاہ بلوچی زبان ءِ ناوانندہ ایں شائرءُ لچہ کار

ھما وھد ءَ کہ من ءَ ١١ سال ات بزاں سال ١٣٣٧ شمسی ءَ ءُ دومی کلاس ءَ ھیچان ءِ دبستان ءَ وانگ ءَ اتاں بزاں ۵٣ سال پیش ءِ گپ انت یک سالے چہ دادشاہ ءُ مھیم خان ءِ کشت کوش ءَ گوستگ ات وشگوناب برز کدّ اسپیت پُچیں یک چمّین مردے اسپیتیں ھرے ءَ سوار ات برے برے ھیچان ءَ ترتاب کتگ ات ءُ گیشتر مرادخان ابراھیم ءِ مھمان بوتگ ات آئی ءِ نام لال بکش ءُ پت ءِ نام جھانشاہ ءُ چہ کرنگِش ٹکّ ءِ مردمان ات آئی ءِ بُندری منند جاہ ھیچان ءِ زرباری ءُ گِہءِ رونندی ءَ کُھلاپ ءِ کلّگ ات آبلوچی شائرے ات آ وھد ءُ زمانگ ءَ زپت سوت نیست ات بلوچستان ءَ ھر کارے بوتگ ات لالبکش ءَ شیئرے پربستگ ات ءُ وتی مجگ ءَ زپت کتگ ات ءُ دیوان درگاھاں دپگال کتگ ات دادشاہ ءُ مھیم خان ءِ اولی شیئر ھمائی ءَ بستگ ات ءُ مھیم خان ءِ برات محمد خان لاشاری ءِ دیوان ءَ دپگال کتگ ات ءُ چہ آئی ءَ پنچ سدی رھوارے ( ھرے یا اسپے) لوٹتگ ات

چہ محمد خان سَکی سردار ءَ لوٹاں پنچ سدی رھوارءَ
من نزاناں ھما اسپیتیں ھر کہ آئی ءِ اولاک ات محمد خان ءَ داتگ ات یا چہ مشکت ءَ آورتگ ات لال بکش ءَ وانگ ءُ نبیسگ پہ بہ نزانتگ ات بلے زبردستیں شائرے ات پہ شائر بیگ ءَ آئی ءَ وت چو گوشتگ : یک روچے یک درویشیں مردے آئی ءِ ھلک ءَ کیت(یئت) آ چہ درویش ءَ لوٹیت کہ چہ ربّ پاک دوایے بلوٹیت کہ آئی ءِ زند ءُ گُزران شرتر ببیت درویش تُکُرّے قند دم جنت ءُ آئیءَ دنت کہ بورئے لال بکش گوشیت کہ آ قند ءِ ورگ ءَ رند من ءَشائری ءِ واھگ ودی بوت ءُ اے ڈول ءَ شائرے بوتاں لالبکش تپنگی مردمے ھم بوتگ یکرندے پہ شکار ءَروت تیر ءِ پلیس(پوکہ) پُشتکائی ترینزیت ءُ آئی ءِ چم ّ ءَ لگّیت ءُ آ چہ یک چمے ءَ زبھر بیت آ مشکت ءَ روت کہ آئی ءِ لھتے سیاد ءُ وارس اوداں ھست انت آئی ءِ بے روکیں چم ءَ دکتر کشیّت ءُ شیشگے مان دنت آئیءَ یک شیئرے وتی چم ءِ بارو ءَ پِربستگ لآلبکش شیشگ چم لالبکش سکیں وشگپّ , گوشکندی ءُ دیوان دِریّں شائرے ات ایرانی ملایانی آشوب ءِ وھد ءَ کہ من ءَ بلوچی زبان ءِ نادراھی ءَ گپتگ ات یک روچے من گوں لھتے سنگتاں لالبکش ءِ گندگ ءَسرگِپتیں چہ ھیچان ءِ کور ءَ گوں منی ریزتالیں لندرور ءَ دیم پہ کُھلاپ ءَ رھادگ بوتیں ماکہ زاران (میرآباد) ءَ سربوتیں لھتے شگیمی بلوچ کہ اومر لشکرخان ھورات ءُ اے ھما وھد ات کہ شگیمی میران نوکر کُشتگ اتنت چہ لندرور ءِ گندگ ءَ آیاں گمان کتگ ات کہ پاسدارانی ماشین انت کمبین لوگے ءَ سنگر گرانت بلے وھدیکہ ما چہ ماشین ءَ ایرکپتیں اومر کندان ءَ مئے دیم ءَ آتک ءُ گوشت ئے کمبھت نزیک ات تیرانی دپار ببئے مااش وشاتک کت ءُ آپ ءُتام ءَ رندمئے ترّتاب ءِ جست کت من پسہ دات لالبکش ءِ گند نند ءَ رویں آئی ءَ پسّہ دات ھچّ ماشینے کھلاپ ءَ شت کت نکنت من وتی ماشینک ھموداں آیانی میار کت آیانی نشون داتگیں راہ ءَ سرگپتیں کہ نیمروچ ءَ رند ات من گوں ھمراہاں کہ گزابیک رئیسی ھم ھور ات بازیں کوہ ءُ کنڈ گاں سرکپت ءُ ایرکپتں ءُ ھموداں سربوتیں ,کھلاپ کوھانی میان ءَ وش ندارگ ءُ وش زیدیں کلّگے ات گوں ڈولداریں مزاپتی مچاں گوں ژیمباژیمبیں کنر ءُ لیمبواں ءُ سارت ءُ ترونگلیں آپ ءَ بلے لالبکش اوداں نہ ات آئی ءِ ١۵ ,١۶ سالی نوگُلگیں بچّ بالانچ ءَ پترے پہ ما کشّ ات آ روچی پہ آولی بر ءَ من کوھی بلوچانی مڑا ءُ منگہ چمان وت دیست ,ما دلمانگ اتیں واتر بکنین بلے بالانچ ءُ آئی ءِ مات ءَ گوشت اگاں لالبکش اداں نہ انت ما ھمدانیں ءُ بالانچءَ سرداری شامے مارادات دو سے بلوچءَ دانکہ نیم شپ ءَ.
مارا نیاد دات تریاک کشّی ھم بوت ,ایدگہ سھب ءَ رگبند وارت ءُ دیم پہ ذاران ءُ ھیچان ءَ چھر کت

ماھے ءَ رند منی سر کیھدا ھیرمحمد ءِ کلگ ءَ کوشک ءَ کپت ھیرمحمد ءَ منءَ نوارے دات کہ لالبکش ءَ داتگ ات آ نوار ءَ لالبکش ءَ مئے مساپرت ءِ شیئرے پربستگ ات ءُ وتی اوداں نہ بیگ ءَ اپسوز زاھر کتگ ات ءُ ھیچان ءِ بندپتر ءُتاریخ ءِ شیئرے ءُ دودا ءِ یک شیئرے ھم دپگال کتگ ات , وھد گوزان ات ءُ من چہ ایرانی ملایانی ترس ءَ چہ ماتیں وتن بلوچستان ءَ درانڈیھ بوتاں , منی ءُ لالبکش ءِ گندنند نبوت من دلمانگ اتان آئیءِ زندھال ءُ پربنداں بنبیساں بلے کامیاب نبوتاں آئی ءَ بلوچی ءِ بازیں کوھن ءُ دیریگیں شعرھم وتی مجگ ءَ زپت کتگ ات
سال ١٣۶١ ءَ یک روچے چاھان ءَ روت اودان ناجوڈ بیت اودءِ مردمان ءَ گوشیت کہ من مِراں ھموداں وسیت کنت ءُآئی ءِ ارواہ چہ کُنٹ (جسد) ءَ بال کنت آدینگ ءِ روچ بیت ءُ منی گمان ءَ آئی ءِ زند ھپتاد ءِ جھل یابُرز ات
یک مردمے من کراچی ءِ جان آباد ءَ دیست آئی ءَ گوشت لالبکش ءَ یک شیئرے ایرانی ملایانی باروا پربستگ نوار ءَ ھم زپت کتگ بلے ھچکس ءَ نداتگ گوشتگ ئے منی مرک ءَ رند شنگ ببیت

واجہ عابد آسکانی ءَ داد شاہ ءِ درستیں شیئر کتابے ءَ سرجم کتگ انت کہ عبد اللہ پیشنی ملا ابابگر لالبکش ملا جان محمد گوھرام آسکانی میر احمد دھانی عزیزاللہ مبارکی م ی دراّ عابد آسکانی ءِ شیئر ھور انت ;آسکانی لالبکش ءِ بارو ءَ اے ڈول ءَ گوشیت : لالبکش ءِ لچہ کاری ءَ اے اندازہ جوانی ءُ الکاپی ءَ جنگ بیت کہ آ کتہ کارینءُ استادیں لچہ کارے وتی زبان ءِ سر ءَ آئی ءَ زنڈیں دزرسی ھست آ بلوچی زبانءِ تب ءَ زانت پمشکا آئی ءِ لچہ چوکلمتی روانبد ءُ جان محمد ءِلچھانی پیمءَ نارھبندیں رنگے ءَ تازی جت ءُ پارسی جت نہ انت
علی رئیسی ٣٠ می ٢٠١١