کماشانی دیوان ٢
کینگی بلوچ , ناکو دلوش ,شے جگردی ءُ ملا لُتُر ءَ دیوان کتگ, اے چاریں کماشاں دنیاِ ءِ کنڈاں ترّتاب کتگ ءُنوں وتی چمدید ءُ ھیالاں درشان کن انت

کینگی بلوچ ; واجھاں بازیں وھدے بیت کہ ما ءُ شما دیوان نکتگ مئے ءُ شمے اولی دیوان سالے ءَ پیش ھما امب ءِ بُن ءَ بوتگ ات ,دزبندی کناں گپ ءَ بنگیج بکن ات
ناکو دلوش : کینگی تو مئے مستر ءُ کماش ئے پیش ءَ تو گپ کن کجا بوتگ ئے چے ات دیتگ ءُ اشکتگ ملالُتر ءُ شے جگردی ءَ دلوش ءِ گپ منّ ات ءُ گوشت کینگی تو بنگیج کن
کینگی : براتاں مروچی دنیا ءَ مزنین چِست ایرے بیگ ءَ انت لیبی بحرین یمن سوریہ مصر ءُ تونس ءَ مزنین مٹ ءُ بدلی بیگ ءَ انت , زین العابدی بن علی چہ تونس ءَ جھت ءُ عربستان ءَ شت , حسنی مبارک ءِ جمھوری ولگوج کنگ بوت , قذافی , علی عبد اللہ صالح ءُ بشار اسد گشے پہ روگ ءَ تیار نہ انت چاریں باریں دیم ءَ چے بیت امریکہ ءُ مگربی ملک وتی نوکیں مراگش ءُ تاسانٹلو ءَ چونکا دیم ءَ برانت , پرچا کہ ھر ڈول ءَ آ بلوٹ انت ھما وڑ ءَ کن انت ,کماشیں براھندگاں من پہ ترتابے ءَ اتیوپی بزاں حبشہ ءَ شتگ ان من دلمانگ اتاں اود ءِ بلوچانی باروا پٹ پولے بکنان بلے چہ اود ءِ دُزّ چرسی موالی ءُ شرابیانی ترس ءَ چہ لوگ ءَ درنکپتاں ,من وتی ھما ترانگ ءَ کپتاں کہ چھبار ءَ وانگ ءَ اتیں برے برے انگریزے یھتگ ات گڈآ رمبے ورنا آیی ءِ رند ءَ کپتگ ات چو کہ ھدامرزیں چراگ نارویی ھو آر یو وات ایز یور نایم کتگ ات , باور کن ات کوش پالیشی دہ دوازدہ سالی بچک گوں من ءَ ھما انگریزی ءَ کت کہ چراگ ءَ گوں گُگلمن ءَ کتگ ات , یکے ءَ من ءَ گوشت ادان بلوچ ھست بلے گیشتر کوھستگی دمگ ءَ انت پس ءُ میش اش ھست آیان ءَ اداں البلوشی گوش انت ءُ وت گش انت کہ آ چہ یمن ءَ اداں آتکگ انت بلے زبان اش عربی نہ انت کڈے بڈے کن انت , من پسہ دات آ زبان آیآنی ماتی زبان انت بلوچی انت
ملا لُتر : کینگی تو پھکیں آجالے ئے تو بچارتین انت آیانی دین مذھب ءُ دگہ دود ءُ ربیدگ پکاّ کتین انت
کینگی : ملا لتر پہ دین ءَ تئی زبان نُکّ ءَ ٹآھک کنت ,من آدیس آ بابا ءَ پہ آبجو زورگ ءَ دکانے شتگ اں پہ ترس لرز انگو آنگو چارتگ کہ یکے منی کوشان چہ پادان مہ کشّیت اگاں آ دمگاں بشتیناں مروچی تئی دیم ءَ ننشتگ اتان ,شے جگردی تو زرمبشتیانی کسّہ ءَ کن
شے جگردی : ھو لندن ءَ راج زرمبشت ءَ مزنین جھکابوستے کت کنکرہ ءُ متینگ بوت ءُ بلوچستان ءِ آزاتی ءِ گپ ءُ تران بوت , من ھیران اں یک سالے گیش بیت کہ آیان آزاتی ءِ جار پرینتگ ءُ یک تپنگے ھم نسراپینتگ , بلوچستان پہ گپ ءُ متینگ ءَ آزات نہ بیت پہ منی گمان ءَ اے مردماں کہ لندن ءَ دیوان کتگ ات یکے تپنگ ءِ سراپینگ ءَ نزانت , واجہ مھندس شھاب ھم آیانی چارچین ءُ سخنگو انت . آیاں اسماعیل امیری چہ پاگواجھی ءَ کشّ ات ءُ عبد اللہ سیاھوئی نوکیں پاگواجہ گچین کنگ بوت ,آیاں گوشتگ ات کہ اسماعیل ءَ شرّ کار نکتگ ءُ گوں گلام رضآ حسین بُرّ ءَ نزیکی کتگ ھدا بزانت بلکیں چو نہ انت ,لھتے ءَ گوشت کہ واجہ امیری نادراہ انت ءُ تپنگ بڈّ ءَ جت نکنت , پدا دگہ بھمانگی گپ ایش انت کہ لھتے چہ کمیتہ مرکزی ءِ باسکاں ھمک شش ماہ یا سال ءِ سر ءَ ایران ءُ بلوچستان ءَ روآ کن انت ءُ بلوچستان ءِ آزاتی ءِ ھارت ھورت ءَ کن انت ءُ ایرانی کوریں ملا واب انت ءُ مورے آیانی گوش ءَ نہ وارت؟؟؟
ملا لتر : واجھاں من شمارا نوکیں ھالے دیاں : واجہ گلام رضا حسین بُرّ چورہ بوت , ناکو دلوش ءَ چہ دل ءِ جھلانکی ءَ کندگے جت ءُ گوشت واجہ پت ءُ مات کرنے بیت کہ مرتگ انت پرچا دروگ بند ئے ,
واجہ داریوش ھمایون حسین بر ءِ مستر ءُ کماش مُرت ,شاھیانی لیڈر , من کیھان لندن ءَ وانت ءُ دیست کہ گلام رضا ءَ احمد وحدت خواہ ءِ نام ءَ آئی تسلیت گوشت ,یکرندے من ءُ یک دکترے ھستینگ ءَ روگ ءَ اتین من چہ واجہ ءَ جست کت واجہ گلام رضا پرچا بے بلا پہ شاھیاں چو شیدا انت ؟ دکتر ءَ پسہ دات آئی ءِلوگ ءِ ھرج ءَ دیگ ءَ انت , من وتی دل ءَ گوشت بزان یارُک پہ لاپ ءَ ھور انت , بلے مروچان واجہ ءَ گلام چہ وتی نام ءَ کشتّگ ءُ رضا حسین برّ بوتگ ,ءُ داریوش ھمایون ھمآ روسیاھیں ایرانی ات کہ آئی ءَ گوشتگ ات اگان امریکہ ایران ءَ بجنت ما گون چنّہ ایں ملایاں ھور بیئن ءُ امریکہ ءَ جنین , شرّ بوت آ روسیاہ سکٹ بوت ءُ مرت آ بلوچ کرد عرب آزری ترکمن ءُ گیلکیانی مسترین دژمن ات ءُ حسینبر آئی ءِ شمس وزیر ءُ قمروزیر ات ءُ پدآ دگہ ھالے شما را دیاں کہ روسیاھیں افشار ھم مرت ءُ شت آ بلوچانی تاریخ ءِ مزنین دژمنے ات آئی ءَ کتابے نبیستگ ات چابھار ءُ دریای پارس دوتین چارپاد دانکہ ۶٠ سال پیش یک پارسی یے چھبار ءَ نبوتگ چے پیم ءَ دریا ی مکران دریای پارس بوتگ , باید انت بلوچ اے مردک ءِ کبر ءَ بسوچ انت
ناکو دلوش :گوستگیں ھپتگ ءَ ملایانی شادی احمدی نژاد زاھدان ءِ یھتگ , شپے روچے ءَ لوگے ءَ بوتگ ءُ لوگ ءِ چپ چاگرد پاسدار ءُ بسیجیان انگر کتگ ءُ چہ جند اللہ ءِ ترس ءَ ڈن ّ ءَ درنکپتگ ءُ آمبولینسے ءَ سوار بوتگ ءُ آمبولانس پیک پاک کنان ءَ بالی پت ءَ برتگ ءُ پالی ءَ سوار بوتگ پوک سیاہ ءَ تھران ءَ شتگ
کینگی بلوچ : ناکو دلوش تئی ھیال لاشاری ءُ مبارکیانی باروا چے انت ؟
ناکو دلوش : آ اے ساھت ءَ ھاموش انت بلے پہ جوانی چارگ ءَ انت کہ دنیا چون بیت , بزگیں کینگی آ منی ءُ تئی ڈول ءَ لچی ءُ داسی نہ انت آیان ءَ پوج ءُ لشکر ھست تپنگ ءُ ٹوپ اش ھست آ چآرگ ءَ انت کہ امریکہ ءُ مگربی ملک مدل ایست ءَ پہ کتام آسر ءَ سر بنت , ءُ بارین ایرانی ملایاں جن انت ؟اگاں شاھی ,مجاھدین تودہ ای ءُ ھر گروھے باھند بکنت آیانی زلورت اش بیت پرچا کہ تپنگ آیانی کوپگ ءَ انت آ سکیّن بلدین انت ,سیاستدان رادیو ءُ تی وی اش ھم ھست انت ءُ واجہ رحیم بندوئی انگریزی پارسی ءُ بلوچی زبانان پہ گلگدار ءُ انترویو سک چالاک ءُ زبانور انت ءُ اگاں یک روچے بلوچستان ءِ آذآتی ءِ باھند چست ببیت راج زرمبشتی ءُ منی تئی ڈولیں لچی داسیاں گوم ندینت ءُ بندوئی چیزے زانگ ءَ انت کہ وتی ریش ءُ بروتی پروفسری کتگ انت
کینگی بلوچ : ناکو دلوش ملا لتر ءُ شے جگردی ما شما دست ھورکیں مردم ایں بلے یک کارے کت کنیں بلوچستانءِ راجدپتر ءُ تاریخ ءِ باروا چیزے کت کنیں مہ وپس ات ءُ لاپ مہ رودین ات وتی ند ءُ کلماں کار بند ات ھرچی کہ پیش ءَ بلوچانی سر ءَ گوستگ ءُ ھنچو مروچی چی بیگ ءَ انت بنبیس ات ءُ چاپ بکن ات , پہ بلوچی زبان ءَ کار بکن ات , بلوچی مئے وتی شھدین زبان انت

آدینگ ٢٢ آپریل ٢٠١١ علی رئیسی