زنڈیں بلوچ ءُ بارگیں پارسی ملا

بارگیں ایرانی ملا ءَ وتی اسپیتیں پاگ پہ دوئیں دستاں سرینت ءُ جھل ءُ برز کت ءُ دیم گوں زنڈیں بلوچ ءَ کت ءُ گوشت : ماشااللہ چشم نخوری انشاللہ ,تو چہ من ءَ جان ءَ پُرّ تر بوتگ ئے . دلوشی ءُ زرّ ءِ واھندی لاپ ءَ زنڈ ءُ دیم ءَ جرپ کنت . چنت لوگ , آسیدگیں کار ءُ بار ,ماشین ءُ دگہ بازیں دگدکہ تو پہ نئو نئو چہ اسلامی آشوب ءُ انکلاب ءَ وتی بھر گپتگ .تئی پیشیگیں جھد ءُ ھِزمت ما نہ شمشتگ انت .تو لھتے درانڈیھیں بلوچ آورت ءُ مئے دست ءَ دات انت .بلے ما اسان ءَ کدّ بلوچی کروچی چّلے ءَ ھساب نکنیں. تئی رد داتگین ءُآورتگیں بلوچ اکسریتی یا ھما بوتگ انت کہ چہ سربازی ءُ جنگ ءِ ترس ءَ یورپ ءَ شتگ انت . بزاں اے ڈولین چاشُک ءُ چِّلی سربازی ءِ جھوک ءُ اکسریتی چَلّ ءُ پون ھمدان باز انت . دنیگا فرخ نگھدار یورپ ءَ ترّیت ءُ جمھوری اسلامی ءِ توسیپ ءُ ستا ءَ کنگا انت

زنڈیں بلوج ; منی سر, جان ءُ مال پا اسلامی آشوب ءَ سِدَکّہ ءُ کولیگ .من ءَ ھم گپ ّءِ اجازت ءَ بدی.واجہ حجتہ الاسلام شما چھبارءِ کھربا بند کت .کھربا سیاسی ماھتاکے نہ ات . ادبی ماھتاکےات .شما وت اجاءت داتگ ات کہ اے کار ءَ بکنین .پہ درانڈیھیں بلوچانی رد دیگ ءَ گھتریں کارے ات .جمھوری اسلامی ءِ اصل ١۵ گشیت کہ کرد بلوچ عرب آذری ءُ ترکمنان اجازت ھست کہ وتی ماتی زبانان ھمراہ گوں پارسی ءَ وانگجاھاں بوانین انت.من گVن چونیں دپ ءُ آپے ءَ پدا یورپ ءَ بروان ءُ پشتکپتگیں سیاسی بلوچان ءَ رد بدیان. نوں من چونین گورّے پہ وت ءَ بکوچاں .شما منی درستیں پناس ءُ رپک گوں پُران ھوار کت انت

بارگیں ایرانی ; تو وت ءَ انچو دلوارگ مکن.بزوراے دزمال ءَ ارساں پَھک کن .ما را چہ تئی پارس دوستی ,راستی ءُ جان نہ دُزیّ ءَ ھچ شکّ ءُ بدین گمان نیست.مئے ملائی گونچان ءَ وڑوڑیں رپک ءُ مندر ءِ بنڈل ھست انت . ھرچی ما ترا گوشیں تو ھنچش بکن.سرءِ ھوش کن کہ ترا دو برات ھست کہ علم ءُ زانت ءَ چہ ترا دیماتر انت .بلے آ تئی ڈول ءَ مئی کار ءَ نیاینت.تو چہ میلیونی ءِ سیمسر ءَ گوستگ ئے ءُ میلیاردر بوتگ ئے . تئے براتانی دست پا ھیلہ بلاھے ءَ دپ ءَ رسیت.بیست سی مردم ھمک شام ءُ سبارگ ءَ تئی وان ءِ چپ ءُ چاگرد ءَ کونڈان جن انت ءُ ورانت دستاں چنڈ انت ,بروتاں تاب دینت ءُ پاد کاینت

جھل ءَ تو ءُ برزا تو .سر ءَ ھوش کن کہ تو دیپلم ھم نگپتگ . تو دہ کلاس وانتگ .مارا فیلسوف ءُ پروفیسر ءِ زلورت نہ انت .مارا درد واریں مردم ءِ زلورت انت کہ مئے کاراں دیم ءَ ببارت ءُ تئی ڈول ءَ وت ءَ لُگُز ءَ لُگُز ءُ چرپا چرپ بکنت.منی براتیں بلوچ منی ھبراں بد مہ بر کہ مئے پوج ءُ ارتش ءِ وزیر گوگدامانی دکتریں کہ تپنگ ءِ سراپینگ ءَ نزانت . مئے انکلاب ءِ پاگواجھ ءِ دست یکیں ءُ وتی زند ءَ یل تیرے نسراپینتگ . ھوآیی دریائی زمینی تاکتانی سرمھار آئی ءِ یکین چپی دست ءَ انت.ایرانی ھوڈیں مردم انت . شیعہ مذھب ءَ کّر کور ءُ گُنگ کتگ انت.ھما کہ مھندس دکتر استاد ءُ سیاستدان انت وھدیکہ امام زمان ءِ نام ءَ چہ مئے دپ ءَ اشکن انت گنوکیں پسانی ڈول ءَ وتی سراں دیوالان جن انت . وتی سر ءُ سینگان پہ کارچ ءُ زمزیل چوپ انت . اداں ھوڈیں سرنایانی ملک انت .شیعہ مئے دین ءُ مئے سیاست انت ءُ سیاست مانا ءُ بستار زر ءُ مال ءِ واھند بیگ ءُ ٹگی ٹوری انت . تا کہ دنیا ھست اے جنگ دیم ءَ روت . نوں مئے دور انت . رند ما تپر . اُو مئے بلوچیں برات دیم ءِ گچینکاری ءَ ترا مجلس اسلامی ءُ پارلمان ءِ چارپادک ءِ سر ءَ نندگی انت .وتی مجگ ءَ بہ ٹُکّ کہ تو مئے دام ءَ کپتگ ئے ءُ دراتک نکن ئے .اگاں درکپگ ءِ جھد ءَ بکن ئے تئی سر ءَ چو ھچک ءِ پُل ءَ چنین . اگاں مئے لوٹانی سر ءَ کار مکن ئے یک سرسباھے تئی مال روپگ بنت ءُ گوں ھشکیں گوشاں چھبارءِ تیاب دپ ءَ گوں تراشتگیں سر ءَ کین درا دیدلی دالی جن ئے

زنڈیں بلوچ ; واجہ من دگہ وَ ھبرے نکت کہ تو منی سر ءَ چو بشّی جمبر ءَ بند وارتگ . من شمے دزبوج ءُ گلاماں .. من گوشت اگاں شما کھربا بند مکتیں من یورپ ءِ بلوچ گھتر ءُ زوت تر شمے دست ءَ دات انت .مصر ءِ کور نیل ءَ بکپات بلوچ بلوچی زبان ءُ بلوچستان.منی گپاں چہ دہ ءَ یکےّ بلوچی نہ انت .. ھرچی شما بگش ات من کناں

بارگیں ایرانی; منی بلوچیں برات تو وت ءَ انچو دِلوارگ مکن .انچو ندرتگ کہ پچّ جَنَگ مہ بیت.مئے رپکانی گونچان انگت ءَ پُرّ ءُ کوٹان انت .دلگوش بدار ما اداں جنیناں سنگسار نکنگا ئیں ؟
زنڈیں بلوچ ھو کنگااتاں

بارگیں ایرانی ; گڈا یوروپی ملکاں ایرانی لنڈریں جنین نوبل داد ندات ؟ شیرین عبادی ءَ گوشاں .آیآں اے داد پہ مئے ھکومت ءِ پلامرزی ءَ آئی ءَ دات پہ نپت گاز ءُ وتی تجارت ءُ دی زور ءَ اے کار کت.. زرّءُ ھستی ھمک کار کنت.دلگوش بدار مارا دگہ نوکیں رپکے کنگی انت آ گپ پیشگال اتنت

زنڈیں بلوچ ; بگش منی آقا من ھم رپکبازے ان .من ھم جمھوری اسلامی ءِ ولّ ءِ براں .بسوچ بلوچ ءَ

بارگین ایرانی ; .آ رند ءَ ما ترا لندن ءَ پہ بلوچ کمینیٹی ءِ جوڈینگ ءِ نیمون ءَ دیم دات .تو یورپ ءَ ترّتاب کت ھنوں ما را مراگشے سوئد ءَ ٹھینگی انت کہ بلوچی زبان ءُ بلوچستان ءَ سیاست ءِ باروا بیت . تو وَ زان ئے اگاں اداں بلوچستان ءَ یکے بلوچستان ءِ سیاست ءُ بلوچی زبان ءِ بارواگپ بکنت ما آئی ءِ زبان ءَ چہ بن ءَ کشّیں. البت یوروپ ءِ نندوکیں ھما بلوچ شائر ندکار ءُسیاستدان کہ جمھوری اسلامی ءِ ھلاپ ءَ انت بھر زرت نکن انت . ھما کہ مئے مردم انت اوداں رو انت .ما وت زانین کئے ءُ کئیاں اوداں راہ بدئین . آ مچّی ءِ ھرچ درچ ٹکٹ ءُ بند ءُ بسات ءَ ما دئین بلے نام اپسالا یونیورسیتی ءُ کارینا جھانی ءِ بیت . بچار مئے ملائی رپکاں او زنڈا زنڈیں بلوچُک .دور سیاھیں پاگ ءِ دور انت.ایرانی شدیگیں پس انت ءُ پہ گڈّگے ءَ مئے رند ءَ پیک انت
زنڈیں بلوچ ; گڈا واجہ بگش من چے کت کناں

بارگین ایرانی ; پیش چہ اے دیوان ءِ برجم دارگ ءِ تو یورپ ءِ ملکاں ترتاب بکن درستیں پشتکپتیں بلوچان دپ کپ . اسلام ءِ شریّاں بگش .آیان ءَ گلا گلو بکن .ما لھتے چہ ھمابلوچان ءَ کہ پیش ءَ کمونیست بوتگ انت ءُ ھنوں مئے گلامی ءَ چیلک آیانی گردن ءَ لونج انت آ دیوان ءَ ھوار کنین .آ دیوان ءِ ھلاسی ءَ ھموان نند انت , مئے رھشون ءِ متابک ءِ باھوٹی ءِ لوٹ چہ آ ملکان کن انت شش ماہ ءُ سالے اگاں باھوٹی آیاں رس ات دیم ءَ گیشتر مئے کاراں گوم ءُ گیگ کن ا نت ءُ اگاں باھوٹی نہ رس ات لھتے ٹگائین انت ءُ کار انت مئے دست ءَ دینت پہ وڑ وڑیں دلوشی ءُ نیمون ءَ کہ شمارا ملیونانی ملیونوام دئین کہ پہ وت ءَ تجارت بلن ات . کھُن بکشّ ات ءُ جُھلین چات بجن ات. بسوچ ات آسارتیں ملکان .ما زانگائین کہ لھتے چہ آملکاں تنگ آتکگ انت بلے چہ مئے ترس ءَ نیاینت .ھنچو کہ مئے دست ءَ کپت انت ما زانیں گوں آیاں چون بکنین .ما تھنا پہ بلوچاں اے ڈول ءَ نکنگا ئین

پہ درستیں ایرانیان وڑ وڑیں مردم دیم دئیں .دژمن اگاں مورے ببیت آئی ءَ ھژدیایے بہ اُشمار .آ مئے ھکومت ءِ نزوری ءِ وھد ءَ مئے زدّ ءَ باز کار کت کن انت . آیانی مروچگیں ھاموشی ءَ مچار . پیش ءَ یک رندے ھمے اسکاندیناوی ءَ بلوچی زبان ءُ رومن رسم الخت ءِ باروا ہنچشین کارے کتگ ات . تو ھم ھور بوتگ ئے . باز بلوچ مئے دست ءَ کپت انت آیاں پیش ءَ بازیں ھارت پورت مئے باروا کتگ ات . آ نون زانگا انت کہ چہ یکمن آرت ءَ چنت چانگ درکیت .آیانی سر چِو لمپی میشک ءَ جھل انت .آ زآننت ءُ ما کہ چونیں کار گوں آیان کنگ بوتگ

زندیں بلوج ; لھتے شمے ھمے نیشوارکتگین بلوچان من ءَ چو کچک ءِ گلرک ءَ دپ ءَ کتگ ءُ گوں وتی ماشیناں یوروپ ءِ کنڈ کنڈ ءَ ترینتگ آ مئے ءُ شمے شرترین کمککار ءُ گموار انت .. بلے من ءَ یک شومیں ھیلے ھست وھدیکہ واب کپاں واب ءَ سک گُرّگاّر کنان کہ شما خُر ءُ پف گوش ات . آ بزگّ دانکہ سھب ءَ واب نکپ انت بلے پہ شما ءُ اسلام ءِ ھاتر ءَ دیم ءَ تھار نکن انت . منی گرّگاپاں سگّ انت

بارگیں ایرانی ; آ شرّ زاننت اگاں تئی ھمراھداری ءَ مکن انت ءُ خُّ ءُ پفاں مہ سگّ انت گڈا کہ دومی رندا کہ پہ بلوچستان ءِ سوھتگیں کوھانی چارگ ءَ کاینت گوں آیاں چونین کار کنگ بیت .ما آوان ءَ ھنچشیں کانیگ ءَ آپ داتگ کہ عرب وتی نیزگ ءَ اوداں دور ند نت .لھم لھمیں چیرپناھیں گلامی .بے تواری ءُ ھاموشی ءِ گلامی . راست گوشیت شموشتوں ترا بگوشاں ایتالیا ءَ ترا یک کارے کنگی انت زلور دکتر بدل خان ءَ درگیج ءُ منی ھاسیں سلامان ءَ آئی ءَ سرکن .آشرین دکتریں .چہ پاکستانی بلوچاں یکے آ دیوان ءَ کیت . تو ھموداں آئیءَ گند ئے .عضیم شہ بخش تئی ھاسیں سنگت ءُ مئے شرتریں نمائندگ آ دیوان ءَ گپ ءُ تران کنت

زنڈیں بلوچ ; گڈا مراد چہ آ دیوان ءَ چے انت ؟
بارگیں ایرانی ; مئے گچین کتگین مردم کہ اوداں روانت ایانی نبشتانکاں پیش ءَ مئے مردم چار انت ءُ ٹپاس انت .آ نبشتانک بلوچی زبان ءُ سیاست ءِ بارو ا انت آیان منیّننت کہ بلوچستان چہ ھزاران سال پیش ایران ءِ جدا نبوتگیں بھریں .ءُ بلوچی زبان یکے چہ پارسی زبان ءِ گالوار ءُ لھجہ آن انت .مارا گون اے کار ءَ درانڈیہ ءُ آزاتی لوٹوکانی باھند کمرنگ کنگ ءُ پروشگی انت .ما زرّ ءِ واھند ءُ آ لپنگائین ءُ وارین مردم انت .بلے پدا ھم ھترناک انت .من ترا پیش ءَ گوشت مورینک ءَ ھژدیایے ھساب کن.زمانگ ھراب انت ءُ امریکہ مئے دژمن انت .پدا مئے یک مرادے درانڈیھین بلوچان ءَ وت پہ وت ءَ جنگ دیگ ءُ دلگرانی جوڈینگ انت .چہ جرمنی ایتالی روس فرانس ءُ انگلند ءَ لھتے بلوچی پت ءُ پولکار اوداں کاینت ماآیان ءَ ڈالر داتگ بازیں ایرانی کہ بلوچستان ءِ بابت ءَ کتاب نبشتگ ھم یارگ بنت . چہ پیپ ءَ ھم یکے کیت کہ تھنا چگرہ کِرتگ زانت . او زنڈُک وتی مجگ ءَ بہ ٹُکّ مئے ملایانی کار بند ءُ تایی ءِ دیگ بوتگ امریکہ انگریز ءُ فرانس ءَ مارا کمک کت ءُ حکومتی مئے دست ءَ دات . البت آ وھد ءَ زمانگ دگہ ڈولے ءَ ات .آیاں ُہ کمونیستانی دیمگیری ءَ کہ اوگانستان ءَ آتکگ اتنت آ کار کت .ما زانگ ااین کہ دیم ءَ چے بیت .ما وتی دژمن ءَ باید انت کہ پیش ءَ پروش بد ئین .امریکہ ءُ آئی ءِ سنگت دلمانگ انت آزاتی لوٹوکین بلوچان ءَ ھژدیا بکن انت ءُ مئے بڈّءَ دور بدینت

زنڈین بلوچ ; واجہ تو من ءَ ھم رھشون ءِ دیگ ءَ بِلّ.ءُ آ ایش انت کہ مروچی انترنت ءِ دور انت .پاکستانی بلوچ پہ بلوچستان ءِ آزاتی ءَ جنگ ءَ انت اودا ں ماھتآک ءُ کتاب بلوچی ءَ چاپ ءُ شنگ بیگ ءَ انت آ گوش انت کہ بلوچستان پیش چہ پاکستان ءَ آزاتیں ملکے بوتگ ءُ ایران رضا شاہ ءِ وھد ءَ انگریز ءُ امریکہ ءَ جوڈینتگ . ایران پارس بوتگ کہ اصفھان ءُ شیراز بوتگ . من گوشاں اے ڈولین دیوانے ءَ شما پرچا ھما بلوچاں نلوٹائین ات کہ ماھتاک شنگ کن انت , کتاب نبیسگ ءَ انت , سیاستدان انت . مزنین ماھیگاں وتی دام ءِ چمگ ءَ بیار ات .ھمایان ءَ زرّ ءُ دلار ءِ ھیلدار بکن ات

بارگیں ایرانی ; تو اداں ناھودگیں ٹاپارے جت .آ مردم کہ تو گوشت انت آ مئے دام ءَ نیاینت .آ اگاں اے وڑیں دیواناں بیاینت آ وتی دل ءِ گپان جن انت ءُ مئے دیوان ءَ بے ڈول کن انت .آ اگاں بیاینت تئی ڈولین ءَ ھمادیوان ءَ گٹ ءَ دار انت ءُ مئے دپ ءَ پہ چمپل جن انت .آ دیوان ءَ باز پارسی مردم کیت کہ بلوچستان ءِ سیا ست ءُ زبان ءِ بارو ءَ گپ کن انت کہ بلوچی یک گالے نزان انت .من انچو کسہ پہ تو جت تو واب ئے .تو انگت ھما جٹّی بلوچی ءِ ھرءَ سوار ئے

زنڈین بلوچ ; پھل کن واجہ من واکی ناھودگیں ٹاپارے جت من مزنین ھوڈی یے کت . مرچی منی سر بروبر نہ انت. دگہ جستے چہ ترا کناں

بارگین ایرانی ; جست کن بلے ناھودگ ءُ سُرنائی جستے مہ بیت . آس ماندار بلوچی ماھتاک بلوچی زبان ءُ بلوچستان ءَ . ءُ بلوچی بگر ءُ بداراں

زنڈین بلوچ ; تو وت ءَ ءُ من ءَ بچار ,تو بارگ بارگ ءُ من زنڈا زنڈاں . تو چو پیتکول ءَ چالاک چالاک ءَ ترّئے پاد کائے نند ئے . من اگاں نشتاں پہ بزگّی پاد کایاں . پنجاہ گام دیم ءَ شت نکنان , دوا درمان پنت ءُ سوج ءَ من دم برتگ . ملائی پنت ءُ سوجے من ءَ دی کہ شمے گونچان ءَ ھمک درد ءِ درمان ھست

بارگین ایرانی ;;تو منی ڈول ءَ بوت نکن ئے

زنڈین بلوچ ; پرچا من بوت کت نکناں ؟ مئے ھون یک رنگ انت , سُھر انت
بارگین ایرانی ; پمیشکا کہ من پارسی یے آن ءُ تو بلوچے یے . من شیعہ ءُ تو سنیّ .مئے دود ءُ ربیدگ ءَ زمین ءُ آسمان ءَ بدلی ھست .منی ھون ملائی ءُ پارسی ھونین ءُ تئی ھون بلوچی ھونین . مگش منی ءُ تئی ھون یک انت . بسوچ سھری ءَ
زنڈین بلوچ ; پدا ھم درمان دارگے

بارگین ایرانی ; من ءَ چار نکاح کتگین جن ھست ءُ ھشت صیگہ کتگین چہ ١۵ دانکہ ٢٠ سال ئے .ءُ تو تریاک کشّ ئے ؟

زنڈین بلوچ ; اگاں تریاک منی مرگ ءِ دوا ببیت من نکشاّں . من چنت جنی ءِ منوّک نیاں . چنت جنی رزوائی ءِ بُن انت .من کجا ءُ صیگہ کجا

بارگین ایرانی ; اگاں منی ڈولءَ کت نکن ئے ھنچو بوزگا بوزگا آلیٹ جن . بہ وپس ءُ گُرّگارّ کن . من گوشت تو منی ڈول ءَ بوت کت نکن ئے .مہ شموش منی سلاماں بدل خان ءُ شہ بخش ءَ سرکن .ترا دگہ شر ین ھالے دیان گوں تئی وابانی خُرپفان سیادی کنت .دیم ءِ گچینکاری ءَ کہ ترا جمھوری اسلامی مجلس ءِ چارپادک ءِ سر ءَ نندگی انت اودان بازیں پیریں ملا ءُ دگہ باسک ھست کہ بازیں ورگ یا دگہ ھیلانی برکت ءَ مجلس ءِ چارپادکانی سر ءَ واب کپ انت ءُ تئی گُرّ ءُ گارّ آیان ءَ چہ واب ءَ جَہ سِرّینیت . مہ شموش دیمترءَ ما را ماں لندن ءُ یوروپ ءِ دگہ ملکاں لھتے دگہ ھنچشین دیوان ٹھینگی انت ءُ مئے چالاکیں باسک ءُ نمائندگ وتی کمال ءَ پیش دار انت .a