اُ ھدا آزمان ءَ برو

شارون حکومت ءِ یک وزیرے رافائیل ایتان ءَ یک ٹِکّ ءُ درائین گلگدارے ءَ مصباح یزدی ءِ ڈول ءَ آھری گپ جتگ ءُ گوشتگ ;مئے جنگ نگن ءُ تیجگ ءِ جنگ نہ انت .زمینانی گرگ ءُ جھودان اوداں جھمنند کنگ نہ انت . مئے جنگ مذ ھبی مفدسّیں جنگین .ما ھدا ءِ حکم ءُ فرمان ءَ رواج دیگ لوٹیں . ھدا ءَ یھودی ءُ جھود چہ دنیا ءِ درستیں قوم ءُ ٹکاّں لائک تر ءُ شرتر گوشتگ ءُ چہ ما لوٹتگ فرات ءُ نیل ءِ میانجین ءَ مزنین اسرائیل ءَ بجوڈینیں .ما وتی اُگدہ ءُ ذمّہ ءِ سر ءَ کار کنگ ءَ ایںءُ ھدا ءِ پشتیبانی ءِ دست مئے پشت ءَ انت

واجہ ایتان ءِ مسلمانین ناکو زھتان مصر سوریہ عراق ءُ ایران ءَ ھمے لوٹ ءُ باواست ءُ داوا ءَ کنگا انت کہ مئے جنگ گوں اسرائیل ءَ قومی ءُ ملکی جنگے نہ انت .نگن ءُ تیجگ ءِ جنگ نہ انت .جنگ پہ گیشترین سرڈگار ءُ زمین ءِ واھند بیگ ءِ نہ انت .جنگ مذھبی مقدّسیں جنگین .پہ اے کارءَ ھدا ما را سکین ءُ پنت دیگ ءَ انت .ھدا ءَ مارا گوشتگ کہ اسرائیل ءِ حکومت ءَ ولگوج بکنین ءُ قدس ءَ آزات بکنیں ءُ اسلام ءِ بیرک ءَ دنیا ءِ چارکنڈ ءَ مِکّ ءُ لِکّ بکنیں.ھدا ءَ کامیابی ءِ مژدہ مسلمانان ءِ داتگ ءُ اسلام گھترین دین زانتگ .الآسلام یعلوا و لایُعلی علیہ

کرنانی کرن گوست ءُ شت کہ بنی آدم ءَ ھدا چہ زمین ءَ آزمان ءَ رھادگ کت .پہ اے کار ءَ پہ ھکّ دین ءَ شرّیں لیبے گوازی کت .پیش چہ اشی ءَ کہ یک ھدائی دین زمینی ءُ جسمانی ھدایانی پادانی چیرءَ بروپیت ءُ یکّیں ھدا ءَ آزمان ءَ بہ نندینیت, زمین دام ھدایانی کست ءُ کینگ ءِ آماچ ءُ جنگ چوپ ات ءُ ھریکے زمین ءِ کُنڈے ءَ وتی ڈول ءَ بادشاھی کنگ ءَ ات .لھتے چہ آ ھدایان المپ کوہ ءِ برزءَ منزل کتگ ات . لُھتے دگہ چو کہ ھند , سند ,کلدہ ءُ آشورءِ ابابتجاھان نشتگ اتنت کہ کاھنان ءُ سجدہ کنوکان آیانی بندگی کتگ ات ءُ لھتے دگہ چو تَکّی ءُ کٹومی (توتم) کہ آیانی بادشاھی ٹک ءُ کٹمی ھردیں ڈگارے ءِ واھند اتنت

چہ ھدایانی بازی ءُ آیانی گِر ءُ کشّ گوں زمی ءُ زمینیاں , بنی آدم ھیران ات کہ گوں کتام ھداءِ ڈُھل ءَ ناچ ءُ سُھبت بگریت . بنی آدم نشت انت ءُ اَگل جوڈینت ءُ پہ اے کار ءَ کامیاب بوت انت کہ اول ءَ یک ھدایے بجوڈین انت , دوم آئی ءَ آزمان ءِ برزترین جاگہ ءِ بہ نند ین انت کہ چہ زمین مردمانی شار شور ءُ کست ءُ کینگاں دور بدار انتءُ بہ رکیّن انت

چہ بازیں کرن ءِ گوزگ ءَ رند نوں لھتے پاد اتکگ انت ھدا اش چہ آزمان ءَ زمین ءَ آورتگ ءُ زمینی جنگ چوپانی تہ ءَ ھور کتگ.چو کہ گندگ بیگ ءَ انت کالین پاول ءِ رو آ , بوش ءِ کلو پیگام ,امیر ءبد اللہ ءِ سھل ءُ تران ءِ نُکسہ , ھورین قومانی (یو ان) ءِ بنجاہ ءِ مراگش پہ میدل ایست ءِگرءُ کش ءُ جنگ ءِ توسینگ ءَ کارساز نہ انت , پہ ھداءِ کمک ءُ مدت کنگ ءَ چن ءُ لانچے ءِ زلورت انت ءُ آ چہ اے جنجال ءَ رکینگی انت کہ آزمان ءَ بروت تاکہ جنگ ءُ چوپ ھلاس ببنت

بے روزگار ءُ تنگدستیں مردے لوگ ءِ کنڈ ءَ نشتگ ات ءُ گم ءِ کونڈ دل ءِ سر ءَ ایر کتگ اتنت . جن ءَ گوں آئی ءَ گوشت ; چہ تو ھرکت چہ ھدا برکت . پادا برو جھد ءُ کوشستے بکن ھداروزیک رسان انت ءُ مئے روزیک ءَ ھم دنت . مرد پاد اتک ءُ چہ لوگ ءَ درکپت تاکہ مگرب تھار ءَ ترّات ءُ جست کت کس ءَآئی ءَ کارے ندات.چہ دست ھورکیءِ سبب ءَ لوگ ءَ نہ شت , دیم پہ گیابان ءَ شت ءُ درچکے ءِ سر ءَ وپت.بامدپ ءَ پکیرے آتک ءُ درچک ءِ چیر ءَ نشت ,آئی ءَِ مردمکے چہ گِل ءَ جوڈ کت ءُ وتی دیم ءَ ایرکت ءُ گوں آئی ءَ گوشت یئ ;اُ آدم درستیں واری ءُبزگی تو پہ ما جوڈینت انت کہ جن ءِ ھبر ات گپت ءُ گندم ات وارت ءُ چہ جنت ءَ درانڈیھ کنگ بوت ئے ءُ ما تئی اوبادگاں تاکہ کیامت ءَ اے درانڈیھی ءُ بزگی ءَ بہ سگّین .اے ڈول ءَ گوشت ءُ وتی دزلٹّ آدم ءِ سر ءَ جت ءُ کشت ئے

دمانے ءَ پد دگہ مردمکے اڈ کت ءُ گوں آئی ءَ گوشت ;اے موسی تاکہ تو نیھتگ ات ئے قومی ءُ دینی جنگ نیست ات .تو جھود ءِ قوم چہ نیل ءَ آ دیم ءَگوازینت ءُ ارض موعود ءَ برت .تور سینا ءَ شت ئے گوں ھدا عِ گپ ءُ رپ کت ءُ چہ ھدا ءَ پیگام اِت آورت کہ جھود ءِ قوم چہ ھدا ءِ درستین قومان لائک ترانت .بزاں قومیءُ دینی جنگ ءِ بن ھشت تو ایر کت کہ تا دنیا ھست اے جنگ دیما روت , تئی دوا مرگ انت , اے گپ ےے جت ءُ دزلٹ موسی ءِ سر ءَ ایرآورت ءُآئی کشت

ایدگہ نبی ءُپیگمبر ھمے ڈول ءَ جست پرس کت ءُ کشت انت تاکہ باری پہ شیتان ءِ رس ات . دیم گوں آئی ءِ کت ءُ گوشت ئے ُاُ ناسرپد ءُ ھبر گوش نداروک ءُ نافرمان اگاں ھداءِ ھکم ات منتّگ ات ءُ آدم ات سجدہ کتگ ات تئی جاہ جنت ءَ ات ءُ ماھم درانڈیھ ءُ آوارہ نہ اتیں .دزلٹ ءِ جھل یایگ ءَ شیتان ءِ زند کُٹینت

گُڈ سر ءَ چہ گل ءَ ھدا اڈ کت ءُ گون آئی ءَ گوشت ; ھکیّں ھبر ءَ بلوٹے درستین پلینڈی ءُ پسات چہ ترا انت .شیتان تو اڈ کت .ءُ تو زانتگ ات چہ گل ءَ اڈ بوتگیں آدم ءَ سجدہ نکنت پدا آئی ات ھُچّ کت ءُ اے شار شور جوڈینت . کوہ تور ءَ آ گپ ات گوں موسی ءَ کت انت . موسی ءُ عیسی تو جنگ دات انت .. تو ..... دزلت برزادی برت کہ ھداءِ سر ءَ ایربیاریت کہ مرد ءَ چہ درچک ءِ سر ءَ کوکار کت ; مجن کہ دنیا ویران ءُ سرچیر بیت.پکیر ءَ ھیال کت کہ کوکار چہ آزمان ءُ عرش ءَ پیداگ انت ,چہ ترس ءَ دلترک بوت ; دیم پہ چیر ءَ کپت ءُ مرت

مرد چہ درچک ءَ ایرکپت ءُ پکیر ءِ کچکول پٹّ اِت .چیزے تلاہ ءُ نگرہ ءِ زرّکچکولءَ ات . زر زرت انت . نگن ءُ تیجگے زرت ءُ لوگ ءَ شت

جن ءَ گوشت من نگوشت ھدا روزیک رسان انت ,
مرد ءَ پسہ دات مپت ءَ منی نداتگ انت , آئی ءِ جان اوں نجات داتگ ءُ چہ مرگ ءَ رکیّنتگ

اگاں المپ ءِ ھدایاں یکدگر ءِ دژمن بوتگ انت ءُ بنی آدم ءِ زند آیانی کست ءُ کینگانی شِرّی ءِ آماچ بوتگ اسلی نیمون ھما باز ھدائی ءِ رھبند بوتگ

اے چونین کِسھے کہ یک , احد ءُ واھدیں ھدا شمبے ءِ روچ ءَ شپکلاھے سر ءَ کنت ءُ جھودانی عبادتجاہ روت ءُ موسی ءِ قوم ءَ محمد ءِ قوم ءِ ھلاپ ءَ شورینیت . آدینگ بزاں جمعہ ءِ روچ ءَ پاگے سر ءَ بندیت ءُ مسلمانانی مسیت ءَ روت اشان ءَ آیانی ھلاپ ءَ پنت دنت . اے ھداءِ کار نہ انت . اے ھدا ءِ ھلاپ ءُ زدّ ءَ یک پندل ءُ رپکے . باید انت ھدا چہ اے رپکباز ءُ پندل سازانی مکر ءُ ھنراں نجات دیگ ببیت کہ چہ زمین ءَ آزمان ءَ بروت ءُ دور چہ زمینی مکاّر ءُ شار شور کنوکاں ھدائی بکنت

اے نبشتانک چنت سال ساری چہ ھپتگی کیھان چاپ لندن ءَ
حکیم حق نزر ءِ نبشتانک ءَ بلوچی ءَ رجانک بوتگ ءُ ماھتاک
بلوچی کویٹہ ءَ ھم چاپ ءُ شنگ بوتگ
بزاں پیش چہ صدام ءِ جنگ ءُ تاچینگ ءُ تالبانی جنگ ءُ روسیاہ
ءُ توسیاہ کنگ ءِ نبشتانکے ءُ مروچاں ملا خامنہ ای ءُ احمدی نژاد
چہ یک نیمگے ءُ اسرائیل ءُ امریکہ ءُ مگربی ملکاں چہ دگہ نیمگے
ھارت پورت ءَ انت ءُ گشئے دگہ جنگے ءِ بو پیداگ انت . جند اللہ ءِ
لشکر ءُ پوج گوں رودراتکی آزاتی لوٹوکیں بلوچاں ھور بوتگ انت
کہ رند چہ ملایان مزنین آزات بلوچستان ءَ بجوڈین انت ءُ ملک توکی ءِ
ڈولیں بلوچ کہ پارسیانی چانوگ وار انت بزاں حزبی ءُ جبھہ ای
گجرانی جنبش سبز ءِ مرتگیں آس ءِ پُراں پچ کوچگ ءَ انت . پہ منی گمان ءَ
گھتر انت آ وتی دکتری مدرک ءُ ڈگریاں سر ءِ چیر ءَ بکن انت ءُ بہ وپس انت
ءُ گجرانی گلامی ءِ واب ءَ بگند انت . یا کہ سرمیچ ءِ کبرستان ءِ کش ءَ کرگینے ءَ گوں تبلیاں مالد ءُ شین اللہ بکن انت