لنگیں انگریز

دنیا ءِ ھر مردمے ءِ سر لندن ءَ بکپیت آ زلور یکشمبے ءِ روچ ءَ ھائید پارک اسپیکر کورنر ءَ روت ءُ چہ اودءِ مچّ بوتگیں مردمانی گپّ ءُ تراناں وتی بالاد ءَ وشنود کنت. اداں ھر کس ھرچی دل ئے بلوٹیت گوشت کت کنت .جنگ ءُ چوپ ءِ اجازت نیست . چار پنچ پلیس اسپاں سوار انت اوداں اشتاتگ انت .دنیا ءِ درستیں رھدربرءُ بادشاھانی بارو ءَ گپّ ءُ تران ءُ ایراد گیری بیت .عشق ءُ عاشقی ءِ بارو ءَ ھم تران بیت . دنیاءِ کماشانی کارتون پیشدارگ بنت ءُ زلم ءُ زور ءِ بارو ءَ تران بیت.یک یکشمبے ءَ من اوداں شتگ اتاں یک سودانی سیاھیں مردے ءَ سعودی ءِ بادشاہ ایرجت ءُ گوشت آ ھروھد ءَ اداں کیت لندن ءِ پنچ استالیں ھوتل ءَ پنجاہ کوٹی کریھ کنت ءُ گوں وشرنگیں جنکاں نبوتگین کنت .آ پرچا مصر ءَ نروت ءُ وتی ریالاں اودءِ جنینان ءَ ندنت . سیھ پوشیں عربیں جنینے ءَ گوشت تو کچکے ئے . سودانی ءَ پسّہ دات من نریں کچکے اں ءُ تو مادگیں کچکے ئے

اداں سیاہاں وتی گلامی ءِ بارو ءَ گپّ کن انت.چنت سال ءَ ساری یک بلوچیں مولوی ءَ شیعیانی بارو ءَ گپ کتگ ات ءُ شیعیاں دیم پہ دیم ءَ زا داتگ ات ءُ گوشتگ ات کہ تو وھابیانی جاسوس ئے .لھتے گوشیت ھدا نیست . عیسائی جاک جن انت کہ عیسی پہ ھمے زوتان کیت. یھودی گوش انت راستیں دین مئیگ انت آدگہ درست دروگ انت

یکّے چہ ھنچشیں روچان کینگی بلوچ ھائید پارکءَ شتگ ءُ وتی چمد یساں درشان کنت
یکشمبے ءِ روتاپ ءُ وشیّں روچے ات ءُ کینگی بلوچ لندن ءِ ھائید پارک ءَ ا وشتاتگ ات ءُ اردو زبانے ءَگشتانک ءَ گوش دارگ ءَ ات .آئی ءَ گوں ترندیں شار شور ءَ گوشت :ما انگریز چہ وتی ملک ءَ تاچینت , مروچی ما وتسر ءُ آزاتیں .سِندی کشمیری ءُ بلوچ چے لوٹنت . ما آیانی زبان ءَ چہ بن ءَ کشّیں کہ مروچی سُرپُر کنگ ءَ انت. پیریں انگریزے ءَ کہ لٹّے دست ءَ ات ءُ لنگ جنان ءَ چہ ھما نزیک َءَِگوزگ ءَ ات دیم گوں سیلچاریں کینگی ءَ کت ءُ گوشت : اے مردک مُپت ھدا وتی گُٹّ ءَ برگ ءَ انت . دنیا ءَ دنیگ ءَ مئے بادشاھی انت .پاکستان ءِ درستیں جھل ءُ برز کنوک انگریز ءِ سیاست ءُ امریکہ ءِ زور ءُ تاکت انت . لاگروسک ءُ ھڈیّیں جناح ما اودءِ قائد کت . بی بی سی ءُ امریکہ ءِ توار ھر نیمگے ءَ وتی شاھیم ءِ پاسنگ ءَ گرانتر بکن انت اودءِ سرپد ءُ ناسرپد ,وانندہ ءُ ناوانند ہ , سیاستدان ءُ شپانک کدیم واریں پس ءِ ڈول ءَ چھرورانت. ضیا ِالحق ءَ تو وَ بلّ . مشرّف کئے ءَ بادشاہ کت ءُ پدا کئے ءَ درکت . دُزّیں زرداری کہ ھشت سال ءَ مشّرف ءَ بندیگ کتگ ات ءُ آئی ءِ گند کشتگ ات انت ,ھمے دزّ کئے ءَ پاکستان ءِ صدر جوڈ کت؟ روس کئے ءَ پروشت ءُ ٹکّر ٹکّر کت

بن لادن ءُ القائدہءُ تالبان کئی اڈ کتگین انت . تالبان ءُ یک چمّیں ملا عمر کئے ءَ جت ءُ روسیاہ توسیاہ کت انت. کئے ءَ صدّام چہ کویت ءَ تاچینت. کئے ءَ صدام چہ ھونڈ ءَ کشّ ات ءُ دار ءَ درتک . ایران ,اوگانستان ءُ پاکستان کئے ءَ جوڈینت انت . ناوانندہ ءُ اسپ چاروکیں رضا کچل کئے ءَ بادشاہ ءُ پدا موریس ءُ اپریکہ ءَ دور دات . محمد رضا کئے ءَ تاچیت . ملاّ خمینی گوات ءَ آورت ءُ بادشاہ کت ؟ قدافی کئے ءَ گُنگ کتگ . دگہ ھبرے ترا گوشاں ,لنگیں انگریز ءَ دیم گوں کینگی ءَ کت ءُ گوشت: اگاں انگریز ءَ عرب ءُ گجرانی نپت ءُ گاز در مگتکین انت آیاں ھزاراں سال ھما ریکسراں ھشتر بتاچینتیں ءُ دیدلی دالی بجتیں ,آیاں زانتگ ات اے ریکانی چیر ءَ نپت ءُ گاز ھست ؟
مروچاں ملا حامنہ ای انگریز ءَ مزنین ھبیس گوشگ ءَ انت . آ وتی بُنگ ءَ گوں گوک ءِ کانٹ ءَ جنگ دیگ ءَ انت. ما آئی ءَ پیش داریں کہ چہ یکمن آرت ءَ چُنت چانگ درکیت

کینگی ءَ جست کت : بلوچانی بارو ءَ تئی ھیال چی انت؟بلوچستان شما سے بھر کت

انگریز ءَ پسہ دات تو بلوچے ئے؟

ھو من بزّگ ءُ درانڈیھیں بلوچے اں
پیریں انگریز ءَ مزنیں کندگ ءُ ٹھکے جت ءُ دپ کینگی ءِ گوش ءِ نزیک ءَ کت ءُ گوشت : شمے گلامی آسر بیگی انت . بلوچستان ءِ بھربھر کنگ چہ کمونیست ءِ ترس ءَ بوتگ . کمونیست ءِ دور کُٹّ ات . بلوچ پنجاپی ءُ پارسیانی دمب ءَ یلہ بدینت . وت پہ وتی کست ءُ کینگاں ھلاس کن ات ءُ تپاک بیئت . رودراتکی بلوچستان ءَ آزاتی ءِ جنگ دیما روان انت . بلے رونندی بلوچاں دموکراسی ءِ دمب داشتگ . اگان چہ گُربگ ءِ کونءَ گوھر کیمتی درکپت .گجر ءُ پارسی ءِ دمب ءَ دموکراسی درکیت . آزاتی ءِ کوکار ءَ جن ات . تانکہ نُنُک مہ گریت مات آئی ءَ شیر ندنت

لنگیں انگریز ءَ دست کینگی ءِ بڈّ ءَ جت , کوٹیں سر ءَ سُرینان بوت ءُ لنگو لنگو کنان ءَ وتی راہ ءَشُت

دلوش بلوچ