من ءُ ایرانی ملایانی آشوب ۴
٧ تیر ١٣۶٠ ءَ بمب ءِ توار من اشکت

تیر ماہ ءِ اول سران ات کہ من ءُ ایسُپ اُزمان سابکزھی چہ ھیچان ءَ تھران ءَ شتگ اتیں .ءُھتل لالہ زار ءَ کریستال سینما ءِ دیم پہ دیم ءَ کوٹی یے کریھ کتگ ات . منی وسرک زھت ءُ آئی ءِ برات شیراز ءَ فوق دیپلم ءِ چکاسّی کلاسے وانگ ءَ اتنت . ما شور کت آیانی گندگ ءَ برویں . ما بالیگراب ءِ ٹکٹ گپت ءَ شیراز ءَ شتیں. آیانی وانگجاہ ڈّن چہ شیراز وش زید ءُ کوھستگی دمگے ءَ ات . ما تاکسی یے گپت ءُ اوداں شتیں . بلے ما چہ آیانی دیدار ءَ ناکام بوتیں کہ آ بلوچستان ءَ شتگ اتنت. ما پدا تھران ءِ چھر کنگ ءِ سوڑگ کت . ایران ءُ عراق ءِ جنگ ات . ما ھر ھتلے ءَ جست کت جاہ نیست ات . بالیگرابانی کارگس ءَ شتیں . آیاں گشت پہ پوشی بیگاہ ءَ شمارا ٹکٹ رسیت. آ وھد ءَ ما دوئیں تریاکی اتیں ءُ بس ءِ دوریں ترّتاب پہ ما مزنیں جنجالے ات

ما ٹکٹ گپت ءُ پدا مساپرھانہ گولِت انت . ماوتی کارت پیش داشت انت کہ وانینوک اں . گُڈ سر ءَ ارم مساپرھانءِ مستر ءَ ما را گوشت کہ شپ ءِ ساھت دہ ءَ من شمارا یک کوٹی یے دیاں . ما وتی کیپک آئی ءِ امانت کت انت ءُ شیراز ءِ سیل ءَ درکپتیں . مئے اولی چیز تریا ک ءِ درگیجگ ات . منی ھمراہ ءَ پیش ءَ شیراز دیستگ ات بلے منی اولی چکّر ات . بل اشی ءَ ءُ بگر آئی ءَ ما سرپد بوتیں کہ گنوکین شیخ صادق خلخالی شیراز ءَ آتکگ ءُ کُشگ ءُ ریچگ ءَ انت. تریاکیاں ھم گرگ ءُ درنجگ ءَ انت . . ما باز جا ھ ءَ شتیں بلے تریاکی چو جِّن ءُ بسم اللہ ءَ گار اتنت . اولی شپ ءَ تریاکی واب کپیت . آشپ ما گوازینت . ایدگہ روچ ءَ خافز ءُ سعدی ءِ ھدیرہ چارت انت ءُ دومی شپ پہ جاندرد ءُ پادرد ءَ گوازینت ءُ بالیپٹ ءَ شتیں . و ھدیکہ تھران ءَ سربوتیں پدا لالہ زار ھتل ءَ شتیں . آ ھتل ءَ تریاکی مردکے کار ءَ ات ءُ پہ تریاکیاں آورتگ ات . پدا مئے بھت ءَ بچار کہ آ مردک بیگاہ ءَ لوگ ءَ شتگ ات کہ سھب ءَ پدا کیت . نوں گِل بیار ءُ ھُشترک اڈّ کن . مئے لوس چو درتگیں بوٹانی لوساں لونجان بو انت

.ما دواھانے ءَ کدیمال گولی لوٹ ات . آئی ءَ مئے بلوچی پچّ چارت انت ءُ پسہ دات کدیمال چھبار ءَ باز انت . ما گوں ھشکیں گوشاں ھتل ءَ چھرکت. ما پہ سارتیں آپ ءَ جان ششت ءُ تھتکانی سر ءَ تچک بوتیں . ھور کمک کمک رچگ ءَ ات کہ اناگت ءَ مزنیں توارے مئے گوشاں کپت . پنچ دمان ءَ رند آمبولانسانی پیک پاک چِست بوت . دانکہ سہب ءَ ما واب نکپتیں ءُ آمبولانسانی پیک پاک گوش داشت ءُ نیم ساھت پہ نیم ساھت جان ششت. بامدپ ءَ من ھتل ءِ دپ ءَ شتاں . روزنامہ کیھان ءِ یک تاکے چاپ بوتگ ات کہ حزب جمھوری اسلامی ءِ کارگس ءُ دپتر گوں بمب ءَ سرچیر کنگ بوت . تریاکی مردک آتک ,ما وت ءَ چت ءُ شّر کت ءُ ڈن ءَّ درکپتیں . بازیں مھلوکے چہ میدان بھارستان ءِ نیمگ ءَ دیم پہ پلاسکو ءِ ماڑی ءَ روان ءُ بنی صدر ءِ ھلاپ ءَ کوکار جنگ ءَ اتنت . یکےّ ءَ اسپیتیں پیلگے گون ات ءُ گوشتی بھشتی ءِپادءِ ڈیھَلُک انت کہ پشت کپتگ . ١٢٩ مردم مرت انت ءُ رند ءَ گوشت اش کہ ٧٢ انت

کوسگیں ھاشمی رفسنجانی آ رمب ءَ ھم ھور بوتگ بلے پنچ دمان پیش چہ بمب ءِ ترگّگ ءَ چہ اوداں درکپتگ ات.. پیشی بلوچاں گوشتگ سے مردم ءِ ھمراہ مہ بئت ءُ چہ آیان بترس ات . ھُردکدّ , زاگُل چمّ ءُ کوسَگ . باریں اے رند ءَ کوسگیں رفسنجانی ملا خامنہ ای ءِ سر ءَ چُلّ ءَ کنت یا نہ . پرچا کہ ھمے مرد ءُ احمد خمینی ءَ خامنہ ای ولایت فقیہ کت

علی رئیسی