اوباما ءَ سیاھیں مکسکے جت ءُ کشت . گوشکند

امریکہ ءِ سیاھیں رئیس جمھور ءَ سیاھیں مکسکے گپت ءُ دور دات. مروچی سُھب ءَ ١٧ جون ٢٠٠٩ءَبی بی سی ءِ تی وی ءَ پیش داشت اوباما گوں دگہ اسپیتیں مردے ءَ اسپیتیں ماڑی ءَ دیم پہ دیم نشتگ ات انت . مکسک ءَ اوباما ءِ چپ چاگرد ءَ چھر وارت .بھادُرّیں رئیس جمھور ءَ وتی گوش رُپ انت ءُ جھد کت کہ مکسک ءَ بگلیّنیت . بلے مکسک آئی ءَ نمرّینگ ءَ ات , گیشتر آئی ءِ سرءُ گوشانی نیمگ ءَ چھر وارت . ءُ گُڈ سر ءَ آئی ءِ چپّی دست ءِ پشت ءَ نشت. اوباما ءَ گوں راستی دست ءَ چھکّگ ءَ مکسک جت ءُ مکسک شھید کت ءُ دور دات . ءُ گوں چپّی پاد ءَ دور ءُگِستاہ کت . ءُ گوشتی اشی ءِ عکس ءَ بگِر . دورگند ءَ پیش داشت مکسک بے ساہ ءَ کپتگ ات . شیر ءِ شکار .اوباما ءُاحمدی نژاد ءِ پیم ءُ پوڈ یکّ انت . چہ اشاں یکے آپ بزوریت ءُ یکے توشگ , جنگلے ءَ بروانت . شادی لیب بدار انت ءُ مکسک بکش انت. اوباما ءِ اے کار بوش ءِ ترانگ ءَ پرینّیت کہ بگداد ءَ ھما مردک ءَ وتی کوش پہ بوش ءِ جنگ ءَ شانت انت بلے بھادّریں بوش ءَ سر جھل کت ءُ وت ءَ بچائینت. ھو امریکہ پہ تئی صدراں . ما بلوچاں وتی دل وش کتگ ات کہ سیاھیں رئیس جمھور ایرانی ملایان ءَ جنت ءُ بلوچستان آزات بیت . اے مردک کہ ویت ھاوس ءَ نشتگ ءُ مکسک گریت چہ اشی ءِ بردست ءَ ھور ءِ نشانی گندگ نبیت

ھما زمانگاں کہ من چہبا ر ءَ وانگ ءَ اتاں رجو نامیں مردے ءَ دکانے ھست ات . دکان ھنچنائیں دکانے ات . ریزُکی چیز مان ات . گراک نیست ات ءُ دکاّنُک ءَ پنکہ نیست ات . رجو دکان ءِ دپ ءَ نشتگ ات ءُ مدام مکسک پہ دست گپتگ ات ءُ پٹیّنتگ ات ءُ رند ءَ وتی دست بو چتگ ات

کینگی بلوچ