آزمانکُک

اشی ءَ من نہ مناّں

روایرشتی بلوچستا ن ءِ بلوچیں وانینوکے کراچی ءَ سر بوتگ ات کہ مزن ھور ءَ بروت ءُ چہ اود ءِ بلوچیں براتاں گڈّ ءُ پنڈے بکنت .بلوچ راج زرمبشت ءِ سیاسی کواّساں کہ اے ڈولیں مردمانی شکار کنگ ءِ رندءَ انت چہ اے ھال ءَ سھیگ ءُ سرپد بوت انت. دو سے زبردست ءُ چالاکیں باسک ءَ دو پاد وتیگ ات دگہ دو پاد کریہ کت , شلوارانی پادگ تاں کونڈاں لانچت انت ءُ آئی ءِ گندگ ءَ شت انت. آیاں وتی سیاسی مراگش ءُ برنامہ آئی ءَ دات انت.تاکہ بوانیت اش . آ دلمانگ اتنت کہ آئی ءَ وتی کشک ءَ بیار انت تاکہ چیرکائی پہ آیاں کار بکنت

وآنینوک ءَ آیانی کتاب زرت ءُ گوشت ; من پہ سلامتی دبئی ءَ روگ ءَ اں .من شمے کتاب ءَ ترّ ءُ تاب ءِ دوران ءَ شّری ءِ سر ءَ واناں ءُ واتّر ءِ وھد ءَ شمارا گوشاں
ماھے ءَ رند وانینوک پدا کراچی ءَ سر بوت .کواسّیں زرمبشتیاں پدا وتی شلوار لانچت انت ءُ آئی ءِ گندگ ءَ شت انت. وانینوک ءَ وتی ترّ ءُ تاب ءِ شرّیں ترانے کت, ءُ اودءِ بلوچانی توسیپ ءُ ستا کت. آیاں کہ وتی دست مُھر داشتگ ات ءُ پنڈگ نداتگ ات ایر جت ءُ چہ ھاکاں ھاک تر کت انت

گڈسرءَ دیم گوں اسپیت سریں زرمبشتی ءَ کت ءُ گوشت ; سنگت من شمے کتاب وانت. شمے درستیں گپّ ءُ گال ءُ مراگش بے مٹّ ءُ بے درور انت . بلے شمے یک گپّے ءَ من نہ مناں
شما وتی کتاب ءَ نبیستگ کہ بلوچستان ءِ وانگجاھاں باید انت بلوچی وانینگ ببیت
اشی ءَ من نہ مناّں

_________

نبیسوک علی رئیسی