منءُ ایرانی ملایانی آشوب
٢

چہ ملایانی آشوب ءَ یک ھپتگے گوستگ ات ,گجری اسفند ماہ ءِ اولی ھپتگ ات , منی واجھیں پت ءَ من ءَ گوشت کہ مروچی من ءَ چھبار ءَ روگی انت . وتی کلنڈ یں ماشینک ءَ تیار کن . من پسّہ دات : من چار روچ ساری چھبار ءَ بوتگاں یک ایرانی یے من اوداں ندیستگ . درستیں پارسی تتکگ ءُ شتگ انت . زابلی کیخا نامیں مردکے کہ گاز ءِ کپسولانی مستر بوتگ ءُ پیش ءَ بلوجان ءَ کپسول نداتگ , بلوچاں دراجادراج میز ے ءِ سر ءَ بستگ ءُ پہ گوشت ترومسیں کارچ ءَ چہ سر ءَ دانکہ پاداں ترومستگ . پھرہ ءَ بلوچاں بیرجندی ءُ کرمانیانی دکان سوتکگ انت اوداں ھم یک ماسگی پارسی یے پشت نکپتگ

منی پت ءَ گوشت من اشکتگ واجہ میر مولداد سردار زئی چھبار ءَ انت , من پہ ھمائی ءِ گندگ ءَ رواں. من کلنڈیں ماشینک آس دات ءُ دیم پہ چھبار ءَ سرگپتیں . البت بگوشاں آ دوران ءَ من ءَ چہ درستیں سرداران بد آتکگ ات بزاں شاہ ءِ زمانگ ءَ ءُ سکیّں گجر پرستے اتاں ءُ دلءَ رازی نہ اتاں کہ واجہ ءِ گندگ ءَ برواں .بلے چہ پت ءَ ناچار اتاں کہ آئی ءِ ھمراہ بباں . حاجی کریم بکش سعیدی , میرمولداد ءُ محمد عمر خان بارکزئی ءَ منی پت ھیچان ءِ باروءَ کمک کتگ ات ,پھمیشا منی پت آیانی سکیّں دوزواھے ات

آ روچی ما چھبار ءَ سربوتیں ءُ واجہ میر مولداد ءِ ھنکین عثمان آبادءِ دبستان ات . مااودان شتیں . واچہ ءَ منی پت وتی کشءَ نندینت ءُ من چہ آیان دور اتاں , نزاناں چے اش گوشت . بلے منی چمّ چہ واجہ ءِ لشکر ءِ گند گ ءَ سر ءِ بان ءَ بوت انت . دشتیاری ءُ گنداوگ (کسرکند) ءِ ۴٠٠ تپنگی واجہ ءِ ھمراہ ات کہ گوں تپنگ کتار ,وتاس ءُ سُھریں تیران ءُ بلوچی جامگ ءُ کلاہ ءُ پاگاں جنّاجّن اتنت . واجہ میر مولداد رند چہ میر عبدی خان ءِ تسلیم بیگ ءَ کہ چہ بگداد ءَ تھران ءَ آتک شاہ ءِ واھگدارے ات . من سال ایرانی ١٣۴٩ ءَ اولی برءَ دشتیاری ءِ جادہ زئی کلگّ ءَ وانینوک اتاں ھما سال ءَ من واجہ یک روچے دیستگ ات. یک سھبے من چہ واب ءَ پاداتکاں گنداں دبستان ءِ دو کوٹی ءَ کالی پچ انت ءُ لھتے مردم اوشتاتگ ءُ شاگردانی میز ڈن ّءَ ایر انت . من جست کت : کئی سور انت ؟ کیھدا عثمان ءَ پسّہ دات کس ءِ سور نہ انت. مروچی واجہ میر مولداد گوں لھتے مردماں اداں کیت . من گوشت شما من ءَ دپی جستے بکتیں ءُ اگاں مروچی بازرسے چہ چھبار ءَ بئت منی مدیری شت . کیھدا ءَ پسّہ دات تئی مدیری نروت .واجہ میر مولداد دشتیاری ءِ واجہ انت.ءُ تو وتی نندگی کوٹی ءَ ھم پہ مھماناں ھالیک بکن . مھمان آتک انت ءُ من شاگرد زرت انت ءُ جدگالیں ناکو آچار ءِ ھوٹگ ءِ کِرّءَ چشے ءِ چیر ءَ نشتیں. ماشینی پہ ماشین , ھشتری پہ ھشتر , ھری پہ ھرءُ بازینے پاکٹاّن ءَ آتک انت . واجہ ءِ ھمراہ چنت امریکئی فیلم جوڈینوک اتنت . آیاں چہ دشتیاری ءِ مردمانی زند ھال ءَ فیلم کشّ ات . البت آیان ءَ شاہ ءِ اجازت نامہ زلور گون ات. زمین ءِ گردینگ گوں گوکاں, گوک ءُ گامیشانی دوشگ,ھشتر تاچی , یکّے ھشتر ے ءِبرز ءَ وتی سر جھلادی ءُ پاد برزادی کت انت ءُ ھشتر روگ ءَ ات .بزاں چپّکائی جماز ات. ڈھل ڈومب ھم بوت . من اولی رند ءَ یک ڈھلے دیست کہ نامی رحمانی ات ءُ سکّ توار کتگ ات.امریکئی فیلم کشّ ءَ کہ زنڈ ا زنڈیں پیرمردے ات کمّکے ناچ ھم گپت . من ءُ منی شاگرداں چہ چش ءِ چیر ءَ سیل چارت .بٹّ ءُ گوشت واری ھم بوت , کسے ءَ مارا دپی سلاھے ھم نجت

بل آ وھد ءَ ُ بیا اے وھ د ءَ
من ءُ منی پت جیھل دو ساھت ءِ کساس ءَ اوداں مھتل بوتیں ءُ رند ءَ دیم پہ چھبار ءِ تیاب ءَ شتیں. سر زاھر ءَ چہ لانچاں ساماں ایرگیجگ ءَ اتنت بزاں چھبار دومی دبئی ات . تیر ءُ تپنگ . ابید مرگ ءِ شیر ءَ دگہ ھر چیز ھست ات . چھباری رمبے تیاب ءَ ڈھل ءُ سرنا جنگ ءُ ناچ گرگ ءَ اتنت. پلیس ءُ جاندار مری ءِ تپنگی یا جھتگ ءُ شتگ اتنت یا کہ لوگاں وت ءَ ٹپیّنتگ ات .کہ بچار انت رند ءَ چے بیت

روچ چھبار ءِ زر ءَ بڈّان ات کہ ما دیم پہ ھیچان ءَ سر گپتیں .راہ ءَ من جست کت واجہ ءَ چے گوشت ؟ پسہّ ئے دات تو بچکے یے . من گوشت من مدیرے اں , گوشت ۓ تئی مدیری چی یے . جمھوری ھچےّ نہ انت .پاکستان ءِ جمھوری ءَ بچار . ایران چہ پاکستان ءَ رزواتر بیت

ھمے دوران ات کہ بلوچستان ءِ سرداران ءَ گوں بلوچیں وانندگ ءُ دانائیں ورنایاں ماں پھر ہ ءِ ادارہ آپ ءَ دیوانے کتگ ات کہ ھور ءُ تپاک ببنت ءُ پہ بلوچستان ءَ کارے بکن انت. زانتکاریں ورنایاں آیانی ھوری نہ منّ ات ءُ گوشت اش ما شمے تپاکی ءَ نمنیّں کہ ھر نیمگ ءَ روچ ترّیت شما چھر ور ات. شما روچ گوارچک ات. گڈ سرءَ سرداراں وت ماں وت ءَ سنّت بست ءُ سوڑ گ کت کہ اگاں نوکیں حکومت ءَ یک سردارے گپت درست پاد بیاینت ءُ بلوچستان ءَ ڈاہ شور بکن انت

ھمے دوران ات کہ ھردیں کلگّاں رئیس پاسگاھاں کلگ ءِ لھتے کماش ءُ لچی داسی ورنا پاسگاہ ءَ لوٹائینت انت کہ شپاں آوانی نگھپانی ءَ بکن انت . آیاں گوشتگ ات کہ دُزّیں بلوچ کاینت ءُ مئے تپنگاں پچ گر انت !!!!!!!؟؟؟

علی رئیسی ٢۴ مارچ ٢٠٠٩

ھلاس نہ انت