ھیچان

ھیچان منی ءُ دگہ بازیں مردمانی بوتنجاہ انت. ادءِ بنکّی ءُ ھنیگیں واھند رئیس انت.ھیچان ءِ گوریچانی ءَ نائی لاشار ءُ بنپور انت. زرباری ءَ گِہ ءُ چھبار. رودراتکی ءَ کسرکند ءُ رونندی ءَ بنت انت

سرھہ ءِ کور کہ ھیچا نءِ رونندی ءَ گوزان انت چہ سیہبندِ ءِ کوھستگ ءَ بنگیج بیت.چہ تنک سرھہ تھت ملک ,ھیچان بلپیر کوشک گورانی پتان بندان مُھت ءَ سرا جھلادی بیت دانکہ گوں گِہ ءِ کور ءَ ھوار بیت. پوزگ ءُ کھیر ءَرند گون بلوچ زر ءَ ھور بیت. تنک سرھہ ھما جاہ انت کہ دادشاہ ءَ امریکی ءُ ایرانی کشت انت. پدا ھیچانءِ رونندی گوریچانی ءَ آبگاہ ءِ دمگ انت کہ دادشاہ ءُ مھیم خان لاشاری ءَ یکدگر ءَ کشت

انگریز ءِ کپتن گرانت کہ سال ١٨٠٩ عیسائی ءَ مکران ءَ دیم دیگ بوتگ ات ,نبیسیت : ٢١ مارچ ١٨٠٩ ءَ بنپور ءِ نیمگ ءَ سرگپتیں (چہ گِہ ) مروچگیں راہ ١۴ میل دراج انت. چہ گوردیمان ءُ تنکیں درگان گوزیت دانکہ ھِچّان ءَ سر بیت. ھِچان زیبداریں کلّگیں کہ کلات کور ءِ کِرّءَ انت . ادءِ زمین کشت کشار انت .آپ باز انت .ادءِ نندوک دو ھزار مردم انت.گہ ءِ آھرءُ گُدّسری سیمسر ءُ سرھدات انت . اے ملک ءَ من گوں مردے ءَ دچار کپتاں کہ گشئے سید ے ات .مکّراں ءُ ایدگہ ھمسایگیں ملکاں ترّ ءُ تاب کتگ ات .آئی ءَ رودرآتکی گیشترین زبان زانتگ اتنت ءُ لھتے چہ یورپی زبانان پجّاروک ات . من سرپد نبوتاں کہ چونین مردیں . رندا آئی ءَ پہ من کاگدے دیم دات کہ ارمنی ایں .من سرپد نبوتاں کہ کئے ءَ اوداں دیم داتگ ات

من (علی) بیست سال ءَ ساری مشکت ءَ چہ پیریں مرادبکش علی ءَ اے باروا جست کت . آئی ءَ گوشت آ مرد منی مات ءِ ناکوگ بوتگ ءُ نامی مرادبکش بوتگ .آ بازیں وھد ے ءَ گار بوگت . پیرانسری ءَ ھیچان ءَ یھتگ ءُ ھموداں مرتگ

ھیچان ءِ پیسری نام ھِچان اچاّن ءُ ھِچّان ءُ ایچان بوتگ . دنیگا گہ ءُ مُھت ءِ پیرین مردم ایچان گوشنت. گجری فرھنگ عمید ءَ نبیستگ : ایچان ھما جاگہ ءَگوشنت کہ آئی ءِ چپّ ءُ چاگرد کوہ ببیت.ھیچان پیش ءَ دو شھر بوتگ : شھر گِرد ءُ شھر دراج. مروچان تھنا شھر دراج آباد انت ءُ شھر گرد سیہ ڈنیں . شھر گرد ءِ پیشی واھند عُمان ءِ جو گبّی دمگ ءَ نندوک انت

ھیچان ءِ کھن : کولِگ پشبند ,جھلگی جو ,ءُ پیکھور انت .دگہ لھتے کور جو ءُ چمّگ ھم ھست نام اش کنچُک ,درک ءُکورکان انت

________
ھیچان ءِ منند جاہ

_______
میرکی
ھسارُک
سری ھشتیک
چیری ھشتیک
بازار
گِتان( مروچان ادارہ) انت
پیر کھور

پیش ءَ مچکدگ ءُ شھر ءَ لھتے منند جاہ بوتگ کہ مروچاں نیست انت . آیانی نام تنکین منند ,کلیرکان ,سھمان جوباشان , ملا ءِ زیارت , کلسگان , ءُ سُھرینک بوتگ
ھیچان ءِ گوریچانی ءَ دمبان انت کہ بازیں دمب اودان ھست. زرباری ءَ گور گزیر ءِ دنّ انت. رودراتکی ءَ جکّ ءِ لونڈ ءُ چِلّ دھتران ءِ تلاریں کوہ انت. رونند یءَ کرچِکی ءِ کوہ انت کہ پیشی زمانگاں لنڈیں ورنا آئی ءِ سر ءَ شپان گرماگ ءِ موسم ءَ وپتگ انت . جنگی ڈّن ءِ نزیک ءَ پوجگِلی چمّگے ھست کہ نامی پوتاپُک انت آ پوجگل پہ پوستی ناجوڈی ءَ یک ءُ ٹِّک انت. نپت ءِ چمّگ ھم بوت کنت

چل دھتران ءِ باروا گوشنت کہ سکیّں دیریں زمانگاں بلاھے ءَ اے مزنین تلار بڈّ ءَ بوتگ ءُ چلّ جنک گُد دو چگ ءَ بوتگ انت , بلاہ ءِ گڈّری بند سستگ ءُ چلیں جنک چیر ترتگ انت. پہمیشا اشی ءَ چل دھتران گوشنت
ھیچان ءِ بازیں مھلوکے مشکت ءَ نندوک انت . بلوچی زبان ءَ گپّ ءُ تران کن انت . بازینے وزیر ءُ تاجر انت
واجہ قابوس ءِ اولی وزیر خزانہ باں دارائی محمود محمد مراد ات کہ چنت سال ءَ ساری وفات بوت
عُمان ایر فرس ( جنگی بالیگرابانی ) پیشی مستر تالب میران ات کہ ھیچانی ایں
موسی عبد ایرحمن حسن الرئیسی عمان ءِ مستریں باپاری ھیجانی ایں . دکتر علی وزیر صحّہ .اسماعیل الرئیسی کشت کشارءِ وزیر

اولی جھانی جنگءَ وھدیکہ انگریز ءِ آپی گرابے بُڈّ ات . آگراب ءَ ورد وراکی سامان مان ات . گڈا ھیچانی نسیب ءَ کہ مشکت ءَ ات انگریز کمک ءُ مدت کت . انگریزاں آئی ءَ خان ءِ منسب ءُ تلاھچامپیں ھنجرے دات . نسیب خان ءِ بچّ محمد خان ات کہ چنت سال ءَ ساری وفات بوتگ . محمد خان ءِ بچ حبیب تاھہ ءُ یحیی انت کہ ھست ءُ زندگ انت .,تجارت ءَ دلگوش انت . حبیب مسترین برات انت ,آئی ءَ یک وھدے عربی مجلئ ئے کشتّگ ات کہ نامی الاضوا آت . سید ھاشمی ءَ گوں حبیب ءَ نند ءُ پادا بوتگ

من کتابے منی ھیچان ءِ نآم ءَ نبیستگ کہ پہ چاپ ءَ تیار انت . اگاں ھیچانی زردار منی چارگ ءَ بکن انت چاپ بیت . اگان نہ گڈا مرتگین ءِ کلو پہ زندگینان

_________
ھیچان ءِ مچانی نام

________

مچّ مزاپتی انت دیگر ءُ جوانین کلّگی آبو ءَ گوشتگ کین منی پیسر چّل بیت آبو
آشھی
آگِرّی
مزاپتی
شکری
روگنی
جوھانی
کتمی
روزبھانی
چربان
وشکنک
نگال
حساب
ھلینگی
پاشھار
ھیکل
کلمی
جشتاری
رابی بنپوری
رابی سرچاھی
دیگِر موسبالی زِربرنی بگا برنی چپشُک کمبری کروچ نُھدان گزی (لنڈ ھران) وشکونک گِلکنڈ آبدانی دیگِر ھودرِک نیکدینی

پیشی زمانگاں ابریشمی ءُ کرپاسی گُد ھیچان ءَ گوپگ بوتگ

برنج ءُ گندم ھیچان ءِ کشار انت. امب زیتون ھنجیر پرتکال ترپشیں لیمبو ڈونی نارنج سوپ ھم ھست انت

علی رئیسی ٧ مارچ ٢٠٠٩

http://www.hichaan.blogspot.com/