تهران ءِ کٹريں شيعه واکداراں گوشنت که په "امام زمان" ءِ آيگ ءَ وداريگ انت ءُ آهانی باور انت که هرچے دگنيا هرابتر ءُ جنجالاں گيشتر به بنت "امام زمان" چه جهل ءُ تهاريں جمکران ءِ پـُر پوجگليں چاه ءَ زوتر درکئيت ءُ دگنيا درستيں مردماں شيعه کنت ءُ آهانی سروک بيت ءُ درستاںءَ رکينيت!. آخوندان ءِ اے بے بنيات ءُ کهنگيں مذهبی گپ ءُ نه بيگی کسـّـه هنچو بے سلک بوتگنت که بازسرپدیں شيعه ئيں مردم چه "امام زمان" آيگ ءَ دل ششتگ ءُ آدگه آزاتی لوٹوکيں انسانانی پيم ءَ ايکيم ءُ دلجم بيگ انت که اے آخوندانی اڈ کتگيں مکر ءُ هيلت انت
رند چه واش ءِ مزنيں عالمان ءُ مذهبی رهدربرانی بند کنگ ماں مشهد ءَ آخوندانی تيزيں کارچ په مولوی عبدالحميد اسماعيل زهی ءِ هــڈ ءَ سر بوت ءُ ماں ايراپ ءِ نماز جمعه ءَ چه تهران ءِ مذهبی زورانسری ءُ اهل تسنن ءِ حکانی لگتمال کنگ ءَ گپ جت. اگاں چه اے گپاں نوکيں گپ نهت انت بلئے اولی رند ات که ماں گوستگيں سی سالاں اے پيما تچکاتچک ءُ گوں برزيں توارے چه واجه عبدالحميد ءِ زبان بيان بوتنت. رند چه مولوی ءِ گپاں سپاه ءِ مافيايی سر کمانڈر رستريں رحيم صفوی گوں حکومتی میڈيا ءَ گشت که "ولی فقيه" بزاں آخوند خامنه ای گاريں "امام زمان" ءِ نمايندگ انت هر کس آيی ءِ هلاپ ءَببيت آ هاں پروشت ءُ پروش کنگ بنت
دو سئے روچ چه مافيايی پاسدار صفوی ءِ پاترپ ديگاں نه گوستگ ات که هزارانی هزار نارازيں مردم ۱۳ آبان ءَ چه وتی لوگاں در آتکنت ءُ ماں شهر ءُ بازاراں کوکار اِش کرت که " خامنه ای قاتله ــ ولايتش باطله"ءُ "مرگ بر ديکتاتور" ءُ "مرگ بر خامنه ای " ايران ءِ اطلاعات ءُ چگلی اداره هور گوں سپاه ءِ زورانسری ءُ بلوچ دژمنيں تاکتيکاں بلوچستان ءِ کومی جد ءُ جهد ءَ را باز تاوانبار کتگ. ساواک (شاه ءِ چگلی اداره ) ءُ ساواما (آخوندانی چگلی اداره) دوئين بلوچ ءِ بيگواهی ءِ واب ءَ ديستگ ات. بلئے الحمدالله بلوچستان ءِ مردمی جنز ءُ پهته کاريں ورنا، پارسيانی چگلاں پروش ديگ انت. هما چگل ءُ چگلی اداره که آهاں هشتاد ءُ يک سال انسان دژمنيں کته کاری(تجارب ضد بشری) هست انت، مروچی بلوچ سرمچارانی ديما هچ اَنت
ايشی ءَ شهيد عبدالواحد ماں پيشن ءَ پيش داشت که ايران ءِ چگلی اداره ءُ آهانی ردوارتگيں هـَـنـدی جاسوس چه بلوچ سرمچاران باز پشت کپتگ انت. نئے مافيايی سپاه ءُ نئيکه اطلاعات نزاننت که بلوچ ورنايانی رازداری ءُ بلوچستان ءِ هوربندی جهد تاں کجام حد ءَ مُهر ءُ محکم انت. نبايد انت آهاں بزاننت پرچا که اے مرک ءُ زند ءِ گپ انت. اے بلوچ ءِ سوب يا پروش ءِ گپ انت. مافيايی سپاه ايران ءِ مخابرات بزاں گوانکوانی اداره (تلفنانی اداره) ءِ واهند انت. هچ بر مه شموشيں که ايرانی چگلاں تلفناں کنترل کننت. نوکيا ءُ سيمنز ءِ پاريگيں قرارداد گوں ايران ءِ گوانکوانی اداره هما شيطانی واک اطلاعات ءُ سپاه ءَ داتگ که اينترنت ءِ سرا ءُ تلفنی گپ يا کله ياں په يک اشاره اے کنترل کرت کننت
پميشکا بلوچان هشت پاس ء هشياری پکار انت. گوانکو ( تلفن) ءُ اينترنت ءُ نوکيں تکنولوجی ءَ په وتی جهدانی ديما برگ ءَ بايد انت کار مرز بکنيں بلئے اے پڑءَ نبايد انت بے سمائیءُ بے پرواهی ببيت. پرچا که تهران ءِ انسان دژمنيں حکومت په وتی روچانی گيشتر کنگ ءَ "جنگ نرم" ءَ دير انت اعلان کتگ. مافيايی سپاه ءُ اطلاعات، اينترنت ءُ گوانکو ءُ ديجيتال تکنولوجی ءَ گيش چه هر حکومتے په مردمانی لٹ کٹ ءُ کشتار ءَ کارمرز کنگ انت. نوکيا ءُ سيمنز ءِ آهيريں واهند وتی کمپنی ءِ علمی ديمروی ءِ برورداں په زر بها کتگ ءُ ايران ءِ مافيايی واکداراں داتگ انت. اشکنگ ءَ مافيايی سپاه هنوں په "ياهو" ءِ اينترنتی ديمروی ءِ دست آرگ ءَ تگ ءُ تاچ انت. آهاں اروپايی ءُ امريکايی زرپرستیں دلالان لکانی لک دلار دينت ءُ ديما کننت تاں "يا هو" ءُ" گوگل" همءَ رد بدينت
بوت کنت که اے کمپنيانی لهتيں بے وفائيں کارمند ءُ کاردربر وت ءَ په زر بها بکننت ءُ آخوند خامنه ای ءِ دام ءَ بکپنت بلئے اگاں آخوند خامنه ای گوں آيی ءِ گاریں "امام زمان" آزمان ءَ هم پــَد گ بندنت اے جنجالی دؤر روچے هلاس بيت ءُ ايردستيں کوماں اے چکاس ءَ بـَـرَ نت ءُ ما بلوچاں هم يک روشنیں بانداتےديما انت. هما باندات که چه مافيايی چگلی اداره يانءُ هونواریں سپاه ءُ جاهليں آخوندانی وجود ءَ پهک ءُ پلگار انت انشـــاءِاللہ
پروشت ءُ پروش بات ايران ءِ شيعی فاشيستی حکومت
آزات ءُ آباد بات گنجيں بلوچستان
محمد کريم بلوچ
نوامبر ۲۰۰۹
1 comment:
راج ءِ شـَـهــيــد
گـُـلانی تو گـُلاں بات ئے ، بلوچانی دلاں شات
وطن سر سبز و آبات بات ، مئی مهر ءِ يلاں يات
بـَـلـيـنـيـں زِرد ءِ اوتاكاں ، چِراگانی اُميت ءِ نور
هما ڈيوا مرادانی هما زند زيب كه پـُلاں دات
توئے پـُـلانی پُشت رَندئے ، هزاراں هم ندارگ تو
هزار زند و هزار اُميت ، هزار باندات ءِ چارگ تو
هزار سر بـُرزيانی پَهر ، هزاراں دپترانی گوانك
دلانی رُژن ءِ تو نور ئے ،دلانی زانت و مارَگ تو
ابدمانيں نميران ئے ، نميراں و ابدمان ئے
تو راج ءِ روشنيں زرد ئے ،تو راج ءِ هم دل و جان ئے
تو سَؤليں پُسـَـگاں رُژن ئے ، تو ژيمبيں په شپاں راه ئے
تو سربُرزيں گُليں سَول ئے ، تو ماتكوه ئے تو دَپتان ئے
دل ءَ روك انت چراگءِ نور، چو بيرك بُرز تئی يات انت
تئی راجدوستیءِشوناں،پما هون انت و سَوگات انت
اُميتانی كَلات ءَ په ، په ما بامگواه ءِ اِستار تو
سلام و لَك سلام بيلی، پتو چه راج و تئی مات انت
كريم بلوچ _ تـَهـل
2008 ءِ فوريه
Post a Comment