من ءُ ملایانی آشوب

مروچی سے شمبے ٢٢ بھمن ١٣٨٧ گجری ءُ١٠ فروری ٢٠٠٩ عیسائی انت . سی سال چہ ایرانی ملایانی آشوب ءُ تاسانٹلّو ءَ کبل بوت

بھمن ١٣۵٧ گجری ات ءُ من بنتءِ مدرسہ راھنمائی تحصیلی ءِ مستر ءُ کماش اتاں .دی ماہ ءِ ٢۵ ءَ محمد رضاشاہ گوں وتی بچک ءُ کُچکاں چہ ایران ءَ جھتگ ءُ شتگ ات . شاپور بختیار شآہ ءَ وتی سروزیر گچین کتگ ات . مغربی ملکاں جٹّیں خمینی چہ بغداد ءَ پاریس ءَ آورتگ ات ءُ سوپ ءِ چیر ءَ نندینتگ ءُ آئی ءَ وانینگ اتنت .بنی صدر یزدی ءُ دگہ بازینے آئی ءَ سبک دیگ ءَ اتنت

آ وھد ءَ بنت ءِ رئیس پاسگاہ ژاندارمری بنپوری برز کدّ پزّوریں دیناری ات کہ پیش ءَ ھیچان ءَ رئیس پاسگاہ بوتگ ات ءُ گوں من ءَ پجّاروک . آ یک روچے منی گندگ ءَ آتک ءُ گوشتی ; چہ ما لوٹگ اش کہ تئی بارو ءَ پتّ ءُ پُول بکنیں ءُ آیان ءَ بگوشیں . من جست کت کئے ءَ چہ ترا اے لوٹ کتگ ؟ آئی ءَ پسّہ دات من ترا نگشاں بلے تو وت بزاں .ءُ تو وت ءَ ملایانی ترّ شاپاں ھور مکن. آ وھد ءَ من ءُ دیناری ءَ شراب وارتگ ات. من گوشت او دیناری من ءُ تو ھمپیالگیں سنگتیں , گوں منءَ گوشکند مکن . راست بگوش.دیناری ءَ پسّہ دات ; منءَ ترنداپیں کدّہ ءِ سوگند انت کہ راست گوشاں . اگاں ترا باور نبیت برو چہ تھرانی بے سییم چی ءَ جست بکن کہ تلگراف ھمائی ءَ گپتگ. یک روچے ءَ رند من بےسیم چی دیست . آئی ءَ پسّہ دات ھرچی دیناری ءَ گوشتگ راست انت . اگاں تو لوٹے من تلگراف ءَ ترا پیش داراں

وھد دیم ءَ روان بوت , من نزاناں منی رپوٹ دیگ بوت یا نہ . مغربی ملکاں وتی کارکت . جٹّیں ملا خمینی پرانسیسیاں بالی گرابے ءَ سوارکت ءُ تھران ءَ آورت. آشوب بوت ءُ ما انگت ءَ شاھی کتاباں وانینگ ءَ اتیں . یک روچے تھرانی دانشجو یے مدرسہ ءَ آتک ءُ گوں من ءَ دپ کپت. آئی ءَ گوشت ایران ءَ آشوب بوت ءُ شما واب ات . بسوچ ات شاھی کتاب ءُ دپتراں . آ وھد ءَ من پارسی زبان ءَ آزمانکے نبیستگ ات کہ نام ۓ شیاّدی از پاکستان ات . دانشجو ءَ وانت ءُ گوشتی تو پہ اشی ءِ نبیسگ ءَ باز جھد کتگ .آئی ءَ من ءَ دلبڈی دات کہ گیشتر بنبیساں . رندءَ من آ آزمانک ماں درانڈیھی ءَ گّر ءِ پکیر ءِ نام ءَ بلوچی ءَ نبیس ات

من ءُ ملایانی کسّہ ھلاس نہ انت.............پشتکپتگیں دیم ءَ کیت

علی رئیسی