کتاب درانڈیھ ءِ سرگال



اگاں آدم ءُ حواءِ کسّہ ءُ داستان راستے بہ بیت , گڈا دنیا ءِ اولی درانڈیھ ءُ سرڈھوریں مردم ھما بوتگ انت
آدمءُ حوا ءُ شیتان واجہ ھدا ءِ وتی جوڈینتگین انت. جاندریں آدم ءُ حواءَ ھزار رنگ ءُ تامیں نیبگ ءُ پُلانی میانءَ جنّت ءَ جاگہ دنت.پدا شیتانءَ پرمائیت کہ آیانءَ رد بہ دنتءُ گندم ءَ بہ وارینیت . وھدیکہ لاپ اش پاھار کار انت, آیانی سرءَ گزب کنت کہ جنّت سِل ءُ سگندانی جاگہ نہ انت, یکّے ءَ سراندیپ ءُ دگرے ءَ دگہ کنڈے ءَ دور دنت

رند چہ آدم ءُ حوا ءِ درانڈیھی ءَ دینی کتابانی راھبند ءَ نامدارتریں درانڈیھ مھتر موسی کلیم اللہ انت کہ نمرود ءُ فرعونانی ترس ءَ چّل سال ءَ سینا ءِ ریکستان ءَ سر ڈھور بوتگ.آئی ءَ وتی با ر ءُ بُنگ ھرے ءَ لڈّتگ ءُ قوم یھود ءِ ھمراھی ءَ پسانی شپانکی کتگ . آئی ءَ کلم دپ ءَ بوتگءُ درانڈیھی ءِ زھیرنالیں توار درشان کتگ. رمگ چہ آئی ءِ نل ءِ توار ءَ گِّر بوتگءُ رومست کتگ. ھر ءَ پاد زمین ءَ کِشتگ ءُ سر گوں دراجیں گوشاں دیم پہ آزمان ءَ کتگ ءُ سرّتگ ءُ واجہ ھدا ءِ معجزاتانی رھچار بوتگ

وھدیکہ مسلمانانی مھتر واجہ محمد (ص) ءَ وتی گوم ماں مکّہ ءَ نا گیگ دیست ءُ آئی ءِ نمنّوکاں پہ آئی ءِ کوش ءَ وتی کندورہ برزادی لانچتگ اتنت آ گوں ابابگر ءِ ھمراھی ءَ نیم شپے ءَ چہ مکہ ءَ درکپت انت ءُ گا ر حرا ءَ کوکو موکو ءِ میار بوت انت , کہ آئی ءَ تندے گار ءِ دپ ءَ جوڈینت ءُ کافرانءَ ریپینت . آواجہ یسرب ءَ شت ءُ گوں اود ءِ مردمانی پشداری ءَ وتی پیگمبری مناّئینت

کمیونیستانی پیگمبر واجہ لنین چہ دژمنانی ترس ءَ جرمن ءَ درانڈُیھ ات.مسکو ءَ پہ آئی ءِ وشاتک ءَ ملیونانی مردم شارشور کنان ءَ آئی ءِ ودارءَ اتنت.لنین ءِ واھگداراں آ باربروکیں ٹرین ءِ کوٹی ئیے ءَ گندمانی سرءَ نندینت ءُ ترین ءِ کوٹی مُھر ءُ سیل کت. آ مسکو ءَ سربوت ءُ کمیونیستی باھند سوبین کت.تروتسکی کہ لنین ءِ سنگت ءُ یکّے چہ کمونیست ءِ بن ھشت ایرکنوکان ات چہ استالین ءِ ترس ءَ میکسیکو ءَ شت ءُ باھوٹ بوت, استالین ءِ جاسوساں ھمودان کشت

انگریزءَ نا واننگد گ ءُ اسپ چارینوکیں رضا پہ کمونیستانی باھند ءِ دیم ءِ دارگ ءَ بادشاہ کت ءُ ایرانے جوڈینت.بلے وھدیکہ رضاشاہ ءَ ھیتلر ءِ ھمراھداری زاھر کت, انگریز ءُ روس ءَ گپت جزیرہ موریس ءُ رندءَ افریقا ءَ درانڈیھ کت کہ ھموداں مُرت
رضاشاہ ءِ بچّ محمد رضاشاہ انگریز ءُ امریکہ ءَ پہ وتی نپ ءُ سوتانی دیما برگ ءَ بادشاہ کت. بلے وھدیکہ آئی ءَ کینپرتی بنگیج کت ءُ گوشتی چہ من ءَ مستریں بادشاہ دنیا ءَ نیست, امریکہ ,انگریز ءُ مگربی ملکاں گوں گریتگیں چمّاں تاچینت ءُ ملا خمینی کہ محمد رضا ءَ عراق ءَ درانڈیھ کتگ ات پاریش ءَ برت, کمّیں وھدے ءَ اوداں داشت ,سوپ ءِ درچک ءِ چیرءَ نندینت ءُ سرسوج کت ءُ پرانسیسی بالیگرابے ءَ سوار کت ءُ سُنا ءُ ھوڈیں ارانیانی پاگواجہ کت

ھنوں کہ ایرانی ملایاں مزنیں سِّردورے بنگیج کتگ ءُ گوش انت کہ اے دگدگہ ءُ مزنی اللہ ءَ ما را بکشاتگ ءُوتی پیشی اربابان ءَ دنتان پیش دارگ ءَ انت ,امریکہ انگریز ءُ آیانی مگربی سنگت چن ءُ لانچے ءَ گلائیش انت کہ آئی ءِ نشانی پہ ھمے زوتاں پدّر بیت یوگاند ا ءِ مزن جون ءُ مُشت جنوکیں سر سپاھیگ ایدی امین ءَ گوں لھتے سپاھیگاں یوگاندا ءِ انگریز دوستیں حکومت چپّی کت ءُ وت ملک ءِ مستر بوت. آئی ءَ درستیں اسپیت پوست کہ باز یں گِھ ءُ چاھان ءِ بلوچ ھم ھور ات خہ وتی ملک ءَ تاچینت انت .آیانی مال ءُ مڈّی ھول کت انت.ایدی امین تھتے ءِ سر ءَ نشت ءُ انگریز ءِ سفارتکاران ءَ ھُجّ کت کہ آئی ءِ تھت ءَ کوپگانی سر ءَ بکن انت ءُ پایتخت ءِ مزن راھاں بترّی انت.آ تھت روان ءِ سرءَ نشتگ ات ءُ انگریزاں بد ءُ رد گوشگ ءَ ات. چنت سال ءَ رند انگریز ءِ واھگداراں آئی ءِ زّد ءُ ھلاپ ءَ پاد آتکنت ءُ آ ناچار بوت کہ دیم پہ عربستان سعودی ءَ بتچیت.آ عربستان سعودی ءَ درانڈیھی ءِ وھدءَ مرت

فرانس ءِ مزن نام ءُتواریں ند کات ءُ شائر ویکتور ھوگو کہ ناپلئون ءِ سپاھیگ آئی ءِ کشگ ءِ رن د ءَ اتنت, آئی ءَ جنینی پچّ پوش ات ءُ وشرنگیں جنکے ءِ ھمراہ ءَ چہ سیمسر ءَ گوست .ءُ یورپ ءِ ملکاں درانڈیھ بوت . ایتالیا ,اسپانیاءُ انگلستان ءِ مستر ءُ کماشاں چہ ناپلئون ءِ ترس ءَ وتی ملکاں نندگ ءَ نہ اشت.گڈ سر ءَ ماں جزیرہ ئے ءَ گوں ھما جنک ءَ کہ آئی ءِعاشق بوتگ ات , چیرءُ پناہ بوت ,بلے مدام ناپلئون ءِ ھلاپ ءَ نبشت

نا پلئون ءَ پہ آئی ءَ کاگدے نبشت ءُ دیم دات کہ پرچا وت ات چو بزّگ ءُ وار کتگ. بیا وتی ملک ءَ پہ وژدل ءُ شادانی بنند, پہ اے شرت ءَ کہ منی زّد ءُ ھلاپ ءَ مہ نبیس, ویکتور ھوگو ءَ آئی ءِ پسّہ اے ڈول ءَ دات : اگاں ترا ڈّن جہ فرانس ءَ یک ھزار دژمن ءُ بد واہ ببیت ,چہ آ ھزاریناں یکےّ مناں . اگاں سد ببیت یےّ مناں ,اگاں دہ ببیت یکےّ مناں , اگاں ترا یکّ دژمنے ببیت,آ یکےّں دژمن مناں . من تئی گلامی ءِ چیلک ءَ وتی گردن ءَ لوپ نکناں

وھدیکہ ناپلئون ءِ دور چپّی ءُ وت درانڈُیھ بوت , ویکتور ھوگو ءَ پاریس ءَ واتر کت ءُ اود ءِ پارلمان ءِ باسک بوت.مروچی آئی ءِ لوگ ماں پاریس ءَ میوزمے جوڑ بوتگ کہ دنیا ءِ ندکار شائر ءُ زانتکاریں مردم ءُ دانشورانی زیارتجاہ انت.آئی ءَ وتی مشھوریں ناول بیچارگانی کتاب درانڈیھی ءِ وھد ءَ نبشتگ
پیشی بلوچاں گوشتگ دور کور انت , برے یک نیمگے ءَ کُچّ جنت . دور ءُ زمانگ پہ ھچکس ءَ پادار نبیت.لھتے چہ بلوچانی پیشی جاگہ کلدہ ءُ سوریہ بوتگ کہ جہ آوداں لڈّتگ البرز ءِ چّپ ءُ جاگرد ءَ جاھمنند بوتگ انت.آ دمگ ءِ نام کہ مروجاں مازندران آنت تپرستان ایر کتگ .بلوچاں تپر کوپگ ءَ بوتگ ءُ اردشیر ءِ سپاھیگ پہ آ دمگ ءِ نزیک ءُ اپشاد ءَ نیشتگنت وھدیکہ زالم ءُ رُزوائیں انوشیروان ءَ پہ بلوچانی چُکچین کنگ ءَ وتی لانک ھُرجِت , مزنین چپت چوپ,کشت ءُ کشتار ءَ رند بلصچ دیم پہ کرمان ءُ مکُّرانءَ سرگپتگ انت

مروچی ابید چہ بلوچستان ءَ بلوچ دنیا ءِ باز کُنڈ ءُ کشوران نندوک ءُ درانڈیھ انت. چہ گُمبرون( بندر عباس) دانکہ کراچی ءَ اے دراجیں تیاب بلوچانیگنت ءُ بلوچ نندوک انت. باید انت اے پراھپھنات ءُ بے گوازیں دریا ءِ نام بلوچ زِر ایر کنگ ببیت. بلوچ چہ ھزاراں سال اے دراجیں زر تیاب ءَ نندوک انت

سال ١٩٨١ ءَ کہ ایرانی شیعہ ملّایان وتی زپتءُ زور پہ بلوچاں گیش کتگ اتنت – بلوچانی گِرءُ بند٬ کشت ءُ کشتاراَت – من ءُ دگہ لھتے چہ سنگتاں گیش چہ درامدیں ملّاءِ رسترانی ترسءَ وتی ماتیں وتن بلوچستان ءَ چو دُزّیں تولگانی ڈولءَ شپ جاہ ءُ روچ جاہ اَتیں – گجرانی آبان ماہ ءِ نُھمی شپ ات کہ من پہ چیرکائی وتی آریپیں پت ءِ گندگ ءَ شُتاںءُ چہ آئی جست کُت نوں چے بکناں؟ آئی ءَ پسہ دات: پیشءَ منءِ جست نہ کت – وت اِت گوں ملّایاں ھمراہ نہ کت٬ نوں ھبر چہ ھلوتءَ گوستگ پیشی بلوچاں گوشتگ مرد زید لوٹیت ءُ نامرد وتن -
من پسّہ دات من اے بتلءَ نہ منآّں٬ پرچا کہ مرد پہ وتن ءَ مِرانت ءُ نامرد پادانی میار بنت ءُ تچنت-

آئی ءَ گوشت بتل ءِ مکسد اے نہ انت کہ وتنءَ پہ مدیمی یلہ دئے ءُ دگہ چکّ مہ ترّیں – گوستگیں دورءَ زمانگاں نہ تھنا بلوچان بلکیں دنیا ءِ کنڈ کنڈءِ مردماں وھدیکہ واراِش نکیگ بوتگ تتکگ انت. بلے ھروھد ءَ کہ واراِش گیگ بوتگ پدا واترّ اِش کتگ٬ یکیں تو گوں ھورکیں دستاں ءُ دوئین گوشاں چونیں کارے گجرانی ھلاپءَ کُت کنے – سکّی وھدءَ بی وس وت ءَ پھریزیت – آ کہ دست ءَ ئے ھچ مہ بیت بائد اِنت دژمن ءِ دیما سرءَ جھل بہ کنت٬ دژمن ءِ ناروائیں کاراں بائد اِنت بہ سگیّت یا کہ دژمن ءِ تیرانی آماچ بہ بیت – ءُ چہ ھما شپ ءَ من پادانی میار بوتاں ءُ منی درانڈیھی بنگیج بوت ءُ دانکہ اے وھدءَ دراندیہ آں – بلے گوشئے دل نہ منّیت کہ کبروں درانڈیھی ءَ بہ بیت –

مراھداریں وانوک٬ درانڈیہ کہ تئی دست ءَ اِنت٬ منی نبشتانکانی یک کسانیں بھرے کہ درانڈیھے ءِ وھدءَ باریگ ءَ نبیسگ بوتگ

علی رئیسی
پنچ شنبہ ٢١ نومبر ٢٠٠۶ لندن