راج زرمبش چہ بنگیجی ءَ دانکہ مروچی

سال١٩٨١ ات. بازیں بلوچ چہ ایرانی ملایانی ترس ءَ چہ وتی ماتیں وتن بلوچستان ءَ درانڈیہ بوت انت کہ من ھم یکّے چہ آیان اتاں . منی سر کراچی ءَ کپت . میرمولداد سردارزئی, حاجی کریم بکش سعیدی . میر باران با رکزئی ءُ دگہ لھتے سرحد ءِسرداراں حزب وحدت بلوچ جوڈینتگ ات ءُ چہ عراقیاں ڈالر گرگ ءُ ورگءَ اتنت. محمد خان لاشاری انگت ءَ لاشار ءِ کوھان ات ءُ اشکنگ ءَ عراقی آئی ءِ گندگ ءَ شتگ ات انت . ایران ءُ عراق ءِ جنگ ات . من پیش ءَ مراد امیری معروف بہ پُلُّک کہ مروچاں سوئد ءَ انت بنت ءَ دیستگ ات . مراد کہ چریک فدائیانی واھگ دار ات چہ ملایانی ترس ءَ درانڈیھ ات . پنوچی ,گِھی, پھرہ ای .چھبار ی.,ھیچآنی ,دزّکی ءُ بلوچستان ءِ بازیں ورنا ,کماش ھر یکّے پہ یک نیمونے ءَ کراچی ءَ سرڈھور اتنت . نوں حکومت شیعہ ءِ حکومتی ات. چہ ورنایاں بازینے عربی ملکاں پہ کار ءُ روزگار ءَ شت انت ءُ سردار پہ پِنڈی ءُ دی دی ءَ اماراتی بلوچاں پاچگ ءَ اتنت . یک روچے من گوں مراد امیری ءَ گوشت ; منی ءُ تئی ویزہ ءَ ھچکس نگریت . ملک ءِ کار چہ منی ءُ تئی دست ءَ شت . میر مولداد گوں رمب ءَ چہ عراقیاں ڈالر گرگ ءُ ورگ ءَ انت ,من ءُتو ءُ ایدگہ ورنایاں پرچا گِروار مہ کنیں ؟ مراد پُلُّک ءَ وتی دست ءِ زردیں تبزی سرینت ءُ گوشت علی تئی گپّ وشیں گپّے بلے سردار ھزاراں ٹگّی ٹوری زاننت . مئے کچک آیانی گربگ ءَ نگر ایت . من پسہّ دات سردار ناوانند ہ ءُ بے سواد انت . ما وانند ہ ءُ سوادار . دنیا بدل بوتگ . بیا رمبے ورنا زوریں ءُ وتی بھت ءَ چکاسیں

یک بیگاھے من ءُ مرادامیری, دو پنوچی ورنا کہ آیانی نام من شموشتگ , عبدالگنی اربابی . گِھ ءِ درزادگیں مدیرے کہ نام ئے لَلی ات , مرادمحمد رئیسی , ما اے ھپتیں ورنا دیم پہ عراق ءِ کونسلءَ کہ کلفٹنءِ دمگ ءَ ات سرگپتیں. تین تلوار ءِ نزیک ءَ .کونسل ھانہ ءِ دپ ءَ پاکستانی پلیسے گوں تپنگ ءَ اوشتاتگ ات . ما دروازگ جت . مئے دپ ءُ زبان مراد پلّک ات کہ انگریزی زانتگ ات . آیان ما را لاپءَ گوازینت ءُ دروازگ ءِ لاپی نیمگ ءَ مزنیں کوٹی یے ات

یک مردمے ءَ مئے درستیں نام ءُ نشاں ملکءِ نام ءُ کار ءُ روزگار نبشت ءُ دو کوراّ کورّیں عرب کوٹی ءَ اوشتائینت ءُ کوٹی ءِ دپ چہ پشت ءَ کبل کت ءُ شت . گیش چہ یک ساھتے ءَ ما کوٹیءَ بوتیں. ھما مرد پدا آتک ءُ گوشت ئے من ءَ پھل کن ات کہ شما مھتل بوتگ ات ءُ سبب اے بوتگ کہ ما کونسل ءِ جند لوٹائینتگ کہ گوں شما گپ بکنت . بلے گپ چو نہ ات . آیاں پہ میرمولداد ءَ تلفن کتگ ات ءُ مئے پجّار کتگ ات . اے گپ رندءَ مراد ءَ گوں من گوشت . ءُ میرمولداد ءَ گوشتگ ات من اے مردماں زاناں .بلے اے بچک انت . بلے بچّکاست اش . مااش مزنین دپتر ءَ بُرت . کونسل ءَ گوشت شما اے ھپتیں مردم مدیر وانندہ ءُ زانتکار ات . ما ناوانندہ این سردار ءُ بلوچان شوھاز گنگ ءَ ایں ءُ شما وت مئے گندگ ءَ یھتگ اِت پہ بلوچستان ءِ آزاتی ءَ ھرچی شما بلوٹ ات ما پہ شما کنیں . بلے شما برواِت یک سازمانے اڈ بکن ات . دیم ءِ ھپتگ ءَ آیاں مارا وھد دات . ما ھپتیں مردماں جان آباد ءَ دیوان کت ءُ بلوچستان راج زرمبشت ءِ نام ءَ سازمانے اڈ کت .البت اے نام مراد امیری ءَ پیشنھاد کت ءُ جار ھم مراد ءَ نبیس ات ءُ وشنبیسی من کت . ایدگہ روچ ءَ چہ آ جار ءَ ما بازیں فتو کپی گپت ءُ دیم پہ کراچی ءِ دانشگاہ ءَ شتیں . ما جار ءَ شنگ کنگ اتیں کہ گندیں ورناے گُرّاں ءُ زا دیان ءَ پیداگ انت . من جست کت اے کئے انت ؟ مراد ءَ پسّہ دات شمبہ زین الدینی انت . شنبہ آ وھد ءَ کراچی ءِ دانشگاہ ءَ وانگ ءَ ات . شنبہ ءَ پنچ شش دگہ بلوچیں دانشجو گون ات , مئے رند ءَ کپت . درستاں لٹّے لٹّے دست ءَ ات . آئی ءَ گوشت راج ءِ زرمبش چی انت ؟ مراد پُلُّک سردارانی چمچہ انت . ما پہ ھیلہ بلاھے وت ءَ چہ آیانی دست ءَ چُٹیّنت ءُ دراجکیں بس ءَ سوار بوتیں ءُ وت ءَ لیاری ءَ رسینت .واجہ شمبے زین الدینی ھما دکتر زین الدینی انت کہ مروچاں نروژ ءَ نندوک انت

عراقیاں دو رند ءَ دگہ گوں ما گند ءُ نند کت ءُ گوشت اش کہ شما برو ات تپنگی بلوچ شوھاز بکن ات ما شمارا تپنگ ءُ زرّ ءُ دگہ ازباب دییں . ما ھپتیں سیاستداناں ؟؟؟؟؟؟؟ جان آباد ءَ دیوان کت . پنوچی دو ئیں ورنایاں گوشت اگاں ما تپنگ بگریں ءُ جنگ بکنیں مئے مردمان ءَ ملا گرانت . آ دگہ ھمراھاں گوشت ھنچش انت . من گوشت ھشتر دزکّ ءَ پہ کون کنزکائی نبیت . میر مولداد ءَ گوں سرداراں ٹھک ٹوکے کتگ . ماشما ھم تھک توکے کنیں چاریں دیم ءَ چی بیت . سنگتاں منی ھبر نہ منّ ات . من ءُ مراد امیری پشت کپتیں . پنوچی کویت ءَ شت انت . یک روچے مراد پُلُک ءَ من ءَ گوشت کہ عراقیاں من ءَ گوشتگ کہ تو ءُ علی گوں امان اللہ مبارکی ءَ کہ آ وھداں کراچی ءَ ات گند نندے بکن ات . من پسہ دات جوان انت . ایدگہ روچ ءَ مرادءَ من ءَ ھال دات کہ انشپی من ءُ تو آئی ءِ گندگ ءَ رویں . ما گلشن اقبال ءَ یک ساندویج بھاکنوکے ءِ دکان ءَ کہ تانکہ سھب ءَ پچ ات شتیں . پلکّ ءَ گوشت یکےّ مئے رند ا کیت . ما دانکہ سھب ءِ گوربام ءَ ودار کت بلے ھچکس نیاتک . پہ منی زانگ ءَ امان اللہ مبارکی پہ اے ھاترءَ کہ پیش ءَ منی پت گوں مبارکیاں نوشّ بوتگ گوں من دچار نکپت

مدتّے گوشت مئے پنچیں سیاستدان عربی ملکاں پہ کار ءُ روزگار ءَ شت انت ءُ من ءُ پُلُّک پشت کپتیں .آ وھد ءَ یارمحمد بے وتن مند ءَ ات . من آئی ءِ گندگ ءَ شتاں .آئی ءَ اوداں اوٹلُکے کشّتگ ات . من گوں آئی ءَ گپ رپ کت . آئی ءَ گوشت من شمے جار دیتگ بلے ورنا رمب ءُ وانندہ تپنگ بڈّ ءَ نکنت ءُ ملک بے تپنگ ءَ آزات نبیت . ورنا پہ اوٹلانی نند گ ءُ پرپوسی ءَ چالاک انت . وانندہ ایں ورنا گوجُک انت . من پدا کراچی ءَ واتر کت

آ کہ گوش انت راج زرمبشت ءِ بن ھِشت رحیم زردکوھی ءَ ایر کتگ پھکیں دروگیں . راج زرمبشت ءِ اولی جار ءُ اعلامیہ من ءُ مراد ءُ آ دگہ پنچیں ورنایاں شنگ کتگ . رحیم زردکوھی , یارمحمد بے وتن ءُ دگہ بازینے شاہ ءِ زمانگ ءَ جبھہ آزادی بخش بلوچستان ءِ سرمچار بوتگ انت کہ سرداراں گپت ءُ شاہ ءِ دست ءَ دات انت . رحیم ءُ بے وتن کرمان ءَ دانکہ ملایانی انکلاب ءَ بندیجاہ ءَ بوتگ انت . وھدیکہ آزات بوت انت بلوچستان ءِ آزاتی ءِ نام ءَ جنگ کت نیکہ راج زرمبشت ءِ نام ءَ . من ءُ مراد پہ دگہ کُنڈ ءُ ولایتاں سرڈھور بوتیں ءُ مئے راہ ءِ رندگیری زانتکاریں بلوچ ورنایاں کت کہ وتواجھی ءِ گپ دیم ءَ برت

یک وھدے آیانی پیشونک ءُ پاگواجہ آھرداد بلوچ ات ءُ تھنا وھدتاکے بلوچستان ءِ نام ءَ شنگ کتگ ات ءُ چہ یوان ءَ پہ بلوچاں پناھندگی گپتگ ات . وھدیکہ آوانی سر یورپ ءَ کپت آھرداد کشّ ات ءُ تاجُک آوانی پاگواجہ بوت ءُ عزیز اللہ مبارکی آھانی رھشون ات . تاجُک ءِ پاگواجھی ءِ وھد ءَ آیانی وھد تاک بلوچستان بند کنگ بوت . اشکنگ ءَ گِھ ءِ پاسداراں آئی چمسھر داتگ ات ءُ چنت سالاں راج زرمبشت کرگشکی واب ءَ چیرترّات.نوں راج زرمبشت ءَ شرّیں راھے گچین کتگ ءُ بلوچستان ءِ آزاتی ءِ گپ ءَ کنت ءُ عزیز اللہ مبارکی چو پیل ءَ جُشان انت ؟؟؟ راج زرمبشت ءِ نوکیں پاگواجہ کہ من آئی ءِ نام ءَ نگراں بلے درست زاننت کہ کَئے انت پہ بلوچستان ءِ آزاتی ءَ کُتام گام چِست کتگ ؟ ءُ دیم ءَ چے کنت؟

علی رئیسی