منّت واری

من چہ ھما دوست ,سنگت ءُ آزیزان کہ پہ من گوانکو(تلفن) کتگ ,ایمل دیم داتگ منی ھالچونی کتگ باز منّت واراں .من آھانءَ ھال دیاں کہ پہ منیگی ھِچّ دلاپ مبیئت .من نوں ڈڈّ جوڈ وشّ وشھال ءُ تیاراں . نوں من پہ بلوچی زبان ءِ دیمروی ءُ پہ بلوچ دژمنانی روسیاہ ءُ چِنّہ چار کنگ ءَ وتی وس ءُ واک ءِ اندازہ ءَ دیم ءَ روان بیاں.من چہ درستیں بلوچ ندکاراں شائرءُ لچہّ کاراں ,ازمکار اگازی اکس کشّ ,وشگُٹّ ءُ رجانکاراں دزبندی کناں کہ پہ شھد ءُ شَکلیّں ماتی زبان ءُ دود ءُ ربید گ ءِ دیمروی ءُ بودناکی ءَ چہ گیش ءَ گیش دیم ءَ روان ببئت

روسیاھیں د ژمناں پہ وتی منّ ءَ چہ رودراتک , روایرشت ءُ گریچانی ءَ پہ بلوچانی گار دیگ ءَ تیزیں تپر کوپگ ءَ کتگ بلے آ تپر آوانی وتی گردن ءَ برانّ انت پرچا کہ بلوچ نوں آگاہ بوتگ انت ءُ وتی دوست ءُ دژمن ءَ پجّاہ کارانت. مروچی بلوچانی دژمن وت پرشت پروش ءُ ٹکرٹکر بیگ ءِ آماچ انت .سرمچار ءُ بھادّریں بلوچاں وتی گاماں ترند تر چِست بکن ات .ندکار شائر وتی ند( قلم) تپنگی وتی تپنگ ءَ دست ءَ بگِراِت ءُ زبانی وتی زبان ءُ لِلُک ءَ کا ر بند اِت . مروچی پنجاپی ءِ چِرّک گوات ءَ برتگ ءُ گجر ءُ پارسی ءِ پاگ چہ سر ءَ لکوشگ بوتگ ,مشوکی کرزی تھنا کابل ءَ چو دزیّں تولگے ءَ تِرّشاپ ءَ انت . اگان ڈنّی واک ءُ کدرت یک روچے وتی پوجاں چہ اوداں دربگیج انت یک چمِیں ملا عمر آئی ءِ دنتاناں چہ ....کشّیت. زرگر ءُ دُزیّن زرداری ءِ بِستار ھما سَئیچک ءِ بستار انت کہ کشار ءِ دلگاہ ءَ لِکّ انت تاکہ چلورءُ جوشکاں بترسینیت.بلے چلور ءُ جوشک ھم آئی ءَ نہ مرّینگ ءَ انت آ زاننت کہ آ داریں مردُمکیں.او بلوچاں ھُژّار ءُ آگاہ بئت کہ پہ ھمے زوتاں مزنین مٹّ ءُ بدلی یے میدل ایست ءَ بیگی انت . وت ءَ پہ وتی ماتیں وتن ءِ دست ءَ گرگ ءَ تیار ءُ چالاک بکن ات

دنیاءِ داروک ءُ مزنین واک ءُ کدرت وتی جوڈینتگیں پناّس ءَ دیم ءَ برگ ءَ انت . مہ شموش ات کہ آیوکیں وھد ءَ لھتے عرب ءُ ھند مئے باسک بینت ,وت ءَ گوں آیاں نزیک بکن ات.کہ بلوچ ءِ دراجیں تیاب ءُ جُھلیں زِر دنیا ءَ بے مٹّ ءُبے درور انت . تھنا ۶٠ سال انت کہ پارسی ءُ لونڈواں دست ءَ گپتگ. پیش چہ اے مدت ءَ ھچ ڈنّی واک ءَ اے زر نیم چمّی چارِت کت نکتگ. گمبرن (دوگنبدان) میناب ,جاشک , گوردیم , گوک ءِ سر ,پُزم ,کنرک ,چھبار . تیس ,پسابندن , بریس ,رمین, گوَتر, رزوا ءُ چارپادیں پارسی ءُ ایرانی ءِ ماتانی جھاز نہ انت ءُ پیشکان , گوادر, پسنی ,اورماڑہ ءُ کراچی پنجاپی لونڈو ,دزیّں زرداری ءُ بے گَردنیں التاف حسین ءِ ھم ماتانی جھاز نہ اںت

ای بلوچاں اتحاد پہ وشیں روچاں اتحاد.. دگہ یک گپّے کہ لوٹاں بگشاں آ ایش انت کہ دو سے دانشور ءُ زانتکاریں بلوچ کہ یورپ ءُ آمریکہ ءَ نندوک انت ءُ ھر یکّے ءَ یک حزب ءُ سازمانے اڈ کتگ ءُ چہ پارسیاں دموکراسی ءُ فدرال لوٹنت درستیں بلوچ زانگ ءَ انت کہ اے یک مردُمی پارٹیانی دمب گوں کئی دمب ءَ بستگ . واجہ کریم تھل من ترا دروت ءُ درھبات گوشاں . بلوچ تئی رھشونی ءُ بلوچی نبشتانکانی وداریگ انت .زندگ بات ئے . علی رئیسی........سَئیچک : دھکان دو دار ءَ کہ ھور بستگ انت پشک ءُ شلوار گور دینت ءُ کشار ءِ توک ءَ لکّ کن انت تاکہ مُرگ ,تولگ ,روباہاں بترسیننت کہ گندم ,کیٹگ ءُ تیجگ ءُ دگہ نیبگاں مہ ورانت.آئی ءَ مردُ مَک ھم گوش انت. دراجیں دارے ءِ سر ءَ مزن ءُ اسپیتیں گوکی یا ھشتری ھڈّے شولام انت یا مزنیں پاگے بند انت ءُ کشار ءِتھ ءَ کِش انت اشی ءَ پَلاس گوش انت

اے ھم پہ ترسینگ ءَ کارمرز بیت