آزمانک

کماشانی دیوان

تژن ءُ بچکند ........... کینگی , دلوش ءُ شے جگردی مزن شاھلیں امب ءِ ساھگ ءَ نشتگ ات انت . مزنیں سَپتے چہ رستگیں امب ءَ پُّر ات , سئیں گوں کارچ ءُ چاکواں گورکپتگ ات انت , ورگ ءَات انت. لھم لھم ءَ گپّ ءَات انت .ملّا لُتُر ءَ چہ دیوال ءَ سرکشّ ات. دلوش ءَ گوشت ھما انت گوں پاگ ءَ سر کشّگ ءَ انت. کلام ملایاں بجنات , ھرجاہ ورکایے بوت ملاّ ءِ گوش زاھر بوت انت . بلے چمّ ئے زبر نہ انت , بلکیں مَیَم نکنگ ءَ انت , ھچ مگُش ات . ھنچشک ءَ چارگ ءَ انت ,روت . ملا لتر ءَ پسّہ دات : اگان شما شّر بوت ات بیا ات منی کبر ءَ پہ لٹّ بجن ات . اگاں منی دیدگ نزور انت ,منی گوش ھما ورنائی ءِ گوش انت .کمبھتاں وت واری شرّ نہ انت. اگان نان ءِ دیگ سّک انت بلے سلاہ جَنَگ ھَکّ انت. مردم ھرچاں پیر تر بیت پہ مال ءُ دنیا ءَ رُزّتر بیت. شے جگردی ءَ پسّہ دات اِنچو واز مکن , بیا ھمنگو . چاکو ءَ تیز کن ءُ بیا

ملا لُتُر امب ءَ برگ ّءَ ات ءُ شے جگردی چارِت ءُ گوشت : پہ دگرانی مال ءِ ورگ ءَ مدام شیھانی دپ چو گرک ءِ دپ ءَ پچ انت . کار ءُ روزگارے نکن ات ,ترّ ات ءُ پنڈ اِت ءُ ور ات. ھمے امب ءِ بزّگیں واھُند یورپ ءَ دیدلی دالی جنگ ءَ انت ءُ شما امبان چوسگ ءَ ات. دلوش ءَ پسّہ دات : من آ مرد ءِ وکیلاں . امب پَلّ ءُ مُھر کتگ , آپ ءُ مین کتگ ,زلور امباں وراں . ھمے امب ءِ واھند روسیاھیں ایرانی ملایاں تاچینتگ ءُ درانڈیھ کتگ. ملا , ملا انت . شیعہ ببیت یا سُنّی . نوں شمے دور انت . بلے دور کہ پہ گُرونز ءَ پادار نبوت پہ شما ھم پادار نبیت .ملا لترءَ پسہ دات ; بلوچیں ملایانءَ گجریں ملا چے دیگ ءَ انت . شما مُپت ھدا مارا ایراز گِراِت . ایرانی ملا دوت انت . کینگی ءَ کندگے جت ءُ گوشت ; ملا لتر ما گوں تو گوشکند کت . گوشکند جنتّ ءِ دروازگ ءِ کلیت انت . ھر کس گوشکند مکنت جنت ءَ نروت . ملا لتر ءَ پسّہ دات تواضع کلید در جنّت است. دلوش ءَ دست پھک کت انت ءُ سیگارے بُن دات ءُ گوشت : راست گوشیت تو وتی ھما تھرانی سفر ءِ کسّہ ءَ بکن ,شے جگردی ءَ نہ اشکتگ . سے جگردی مہ اشکنت گھتر انت

شے ءُ ملا کدیمی دژمن انت ملالتر ءَ پسہ دات. شر گڈا دلگوش بدار ات: من اش ھال دات کہ بازیں بلوچیں مولوی ءُ ملا تھران ءَ لوٹائینگ بوتگ انت ءُ منی نام ھم ھور انت . من اول ءَ بھمنتاں یک کلگّے ءِ پیشنماز چونک ءَ تھران ءَ لوٹائینگ بوتگ . دوم وشھال بوتاں دگہ کارے اگاں نبیت تھرانے چاریں ءُ چرپیں دپارے لپلاشت کنیں

شے جگردی : پہ بالیگراب ءَ تھران ءَ شت ات ؟
ملا لتر : تو دل ءَ بدار . پہ اتو مبوس ءَ مااش برت . کلنڈیں بسے ءَ ما اش سوار کت . بس چہ بلوچیں مولوی ءُ ملا ءَ دپ ءَ دپ ات. درست گوں اسپیتیں پاگاں ءُ دراجیں ریشاں . بس ءِ تاچینوک ملایے نہ ات بلے ریشی یے ات . دگہ سیھپاگیں شیعہ ملایے مئے ھمراہ ات کہ مئے رھشون ءُ وراک ءِبند ءُ بست کتگ ات. ھمااول ءَ کہ بس سرگپت مااش پہ کوکار ءُ سلوات ءَ ناچار کت . ھر پنچ دمان پہ پنچ دمان محمد ءُآل محمد ءُ شپ ءِ وھد ءَ معاویہ ءُ یزید ءِ بد رد گوشگ ھم ھور بوت. من وتی کش ءِ نشتگیں پیرین مولوی سُٹُک جت ءُ گوشت اے چونین کسّھیں ؟ من پارسی کلھُکے زاناں . مئے نُکّ ھشک بوت . اے چے گوشگ ءَ انت ؟ آئی ءَ پسہّ دات ھرچی آ گوش انت ما ھم گوشیں . شاہ ءِ زمانگ ءَ بلوچیں ملایاں چے رستگ ات . مارا تمن دیگ ءَ انت . پہ کوکار ءَ مارا چے بیت . ملایانی کار کوکار ءُ سلوات انت

آ دنیا ءَ اگان جست پرسے بوت ھدا وت آیان ءَ گریت .تو لچی داسی ملائے یے .من پسہ دات اے ھورانی اولی ترمپ انت . بچار باریں دیم ءَچے بیت . آئی ءَ گوشت ھرچی بیت بلیّ بیت تو اگاں دم برتگ چماّں چپت کن . واجھاں من گوں شما چے بگوشاں , تھران ءِ نزیک ءَ راھسری کاپہ یے ءَ ما اِش چلوکباب کوبیدہ وارینت . دپ ءَ سکّ وش ات انت . نیم ساھت چہ بس ءِ سرگرگ ءَ گوست گنداں مولوی ءُ ملا یکدگر ءَ چاران ءُ سوَڑَگ ءَ ات انت ءُ منی لاپءَ من ءَ اومان کت . من زانت آ ھم منی نادراھی ءَ گپتگ انت .بسیں دارائینت ءُ آ جاگہ مزنیں ڈنّ ءُ پٹےّ ات نوں بیا سیل ءَ چار , آ ریچکیں ڈنّ ءَ اسپیتیں پاگ ات کہ تچان ات .من کہ لاگریں ملایے اتان ترند تر تچان ءَ رِگتی پشتے ءَ مانتّرات ءُ نشتان .شے جگردی ءَ جست کت اچا گڈا آپ ھست ات ؟ آپ اشکر ات . ما پہ تیّمم وتی کار شرّ کت

واجھاں دلوش ,کینگی ءُ شے جگردی ما تھران ءَ سے روچ ءَ چہ جاہءَ پادیایگی نہ اتیں . بلے شاباش اش بات . مااِش دوا درمان کت . دگہ یک ھپتگے ءَ وشیّں وراک دات کہ من وتی زند ءَ چُشیں وراک نوارتگ ات . ما اش چِت ءُ ساٹت . یک آدینگ بزاں جمعہ ءِ مبارکیں روچ ءَ مزنین نماز ءَ شتیں . ما درستیں مولوی ءُ ملایان ءَ یک یک گِردیں گِلین مُھرے دات کہ ھمشی ءَ سُجد ہ بکنیں . من آ دگرانی بارو ءَ نزاناں بلے من آ گلیں مھر وتی کیسگ ءَ کت. رند ءَ خمینی ءِ ھدیرہ ما را پیش داشت ءُ اوداں ھم مااش ھما گِردیں گِل دات .وھدیکہ ملآ لُتر ءِ گپ پہ ادان رس ات آ سئیناں سَپت ءِ امب ھلاس کتگ ات انت . دلوش ءَپدا سیگارے بُندات ءُ مزنین باکارگ ءُ گارتگے جت ءُ گوشت : واجھاں دیم ءِ ھپتگ ءَ پدا ھمداں مئے دیوان بیت . کینگی ءَ جست کت واجہ ملا لُتُر شمے کیسگ اش گرم دات انت یا شمے مال ءُ متاہ ھما کباب کوبیدہ ءُ گلیں مھر بوت انت ؟ ھو ما بے ھِچّ نبوتیں بلے تمن اش مئے کماشیں مو لوی ءَ دات انت ما نزانیں چنچک اش دات

آ واجہ ءَ کمکلیرے مارا دات کہ چہ گوشگ ءَ نگوشگ گھتر انت . دگہ ھبرے کہ لوٹاں بگوشاں آا یش انت کہ ما درستاں دوئیں پاد یک کوشے ءَ کت انت کہ ما دگہ بس ءَ سوار نبئیں . مزنیں باواست ءُ جَھل ءُ بُرز ءَ چہ ھما داتگیں تمنان چیزے چہ ما پچ گپت ءُ بالیگراب ءِ بلیت ءُ ٹکٹ گپت ءُ دُزاّپ رسینت. چاریں چہ امب ءِ بن ءَ پاداتک انت . ملآ لتر ءَ گوشت من دست ھورک ءَ چوں لوگ ءَ برواں . چیزے پہ چکاں منی دست ءَ لونجان ببیت شرّتر انت . دلوش ءَ پسہ دات پروا مکن لانکی ءَ چہ امب ءَ پُرّ کن ءُ برو . بلے مہ شموش اے امب ھما مرد ئیگینت کہ ملایاں تاچینتگ ءُ یورپ ءَ دیدلی دالی جنگ ءَ انت .آئی ءَ گوشتگ ات کہ ملا چہ شاہ ءَ پہ بلوچاں گندہ تر بینت ءُ ھنچو ھم بوت. واجھاں مہ شموش ات دیم ءِ ھپتگ ءَ پدا ما ھمداں دیوان کنیں . بلوچ ,بلوچستان ءُ دنیاءِ دگہ چست ءُ ایرانی باروءَ گپ ءُ تران بیت

١۵جولای ٢٠٠٩ علی رئیسی