ایرانی پارسی ءَ منی تمن عبد اللہ پیشینی ءِ مسیت ءَ دزّ اتنت

سال ١٣۴۶ ھجری شمسی ات . من پھرہ ءَ کلاس ١٠ ءَ دبیرستان داریوش ءَ وانگ ءَ اتاں. گرماگ ءِ دزھورکی ءَ منءُ منی گھارءِ جود میّا کراچی ءَ شتیں . پاکستان ءَ ایوب خان دور ات ءُ ایران ءَ ھما سال ءَ محمد رضاشاہ ءَ تاج سر ءَ کتگ ات. منی زامات میا چہ کراچی ءَ مشکت ءَ شت ءُ من دیم پہ بلوچستان ءَ سرگپتاں . آ وھد ءَ پیشن ءَ مساپرھانہ نیست ات . یکّے ءَ من ءَ گوشت پہ وپسگ ءَ مسیت ءَ برو . باندات پُست ءِ ماشین پھرہ ءَ روت

من مسیت ءَ شتاں . اوداں دگہ مردکے ھم نشتگ ات کہ بلوچی پشک ءُ شلوار ات . وھدیکہ گپ ءَ لگّ ات من سرپد بوتاں کہ گجریں ءُ کراچی ءَ روگی انت .آئی ءَ راہ ءِ بارو ءَ چہ من ءَ جست پرس کت ءُ من آئی ءَ سرسوج کت. ھوا گرم ات , واجہ مولوی ءَ دو کمبل پہ ما آورت ءُ ما وپتیں . سھب ءَ کہ من چہ واب ءَ بُست کت پارسی گجر شتگ ات . مولوی صاحب ءَ لھتے تیموشیں نگن ءُ کتلے شیر چای آورت ءُ چہ من ءَ جست کت تئی ھمراہ کجا انت ؟ من پسہ دات آ منی ھمراہ نبوتگ . ما ھمداں تئی مسیت ءَ ڈیک وارتگ . من رگبند وارت ءُ دیم پہ پست ءِ ماشین ءَ شتاں

آ وھد ءَ ماشینراہ سرباز ءِ کور ءِ دلگا ہ ءَ ات . پھر ءَ ماشین ءِ واھند کہ ریکی ٹّک ءِ ورنایے ات ءُ نام بیبگر ات کریھاں گران بوت . من وتی کیپ پچ کت گنداں جاہ ھست ءُ جولاھگ گار انت . منی مال ءُ متاہ ٣۵ تمن ات کہ آ شپی مسیت ءَ کیپ وتی سر ءِ گور ءَ ایرکتگ ات . روسیاھیں گجر ءُ پارسی ءَ واجہ ءِ مسیت ءَ وتی دیم سیاہ کت ءُ منی ھزانہ جتگ ات . نوں گِل بیار ءُ ھشترک اڈ کن . من گوں لونجانیں لوساں وتی ءُ گجر ءِ ھال بیبگر ءَ دات . بیبگر ءَ پسہ دات تو دروگ برّ ئے . من سوگند وارت دروگ نبنداں منی ھزانہ پارسی ءَ جتگ . آ وھداں پیشن ءُ پھرہ ءِ کریھ ١۵ تمن ات . بیبگر ءَ گوشت جھندم ١۵ ءَ برو ھپت ءُ نیم تمن بیار . اگاں ناں من ترا پاسپان ءِ دست ءَ دیان . من گوشت منی ملک آسر دنیا انت . اداں من کس ءَ پجاہ نیاران . پجاّہ یارئے نیارئے ترا نیم کریھ دیگی انت آئی ءَ پسہ دات

من آ سال ءِ وانگی وھد ءَ نور محمد کدخدازادہ ءِ لوگ ءَ بوتگ اتان . نور محمد ءَ گاراج ءِ نزیک ءَ دکانکے ءَ گددوچی کتگ ات . پہ بزّگی ءُ شرمندگی آئی ءِدکان ءَ شتان ءُ وتی ھال آئی ءَ دات . نور محمد پادآتک ءُ دگہ دکانے شت ءُ ھپت ءُنیم تمن وام کت ءُ منی دست ءَ دات . ایش انت ایرانی ءِ تمدن ءُ فرھنگ

علی رئیسی