بلوچ ءِ شھمات شاہ حسین صفوی ءِ بنگوش ءَ

یک سالے چہ ملایانی آشو ب ءَ گوستگ ات . من گوں لھتے ھیچانی سنگتاں کہ وانینوک ءُ مدیر ات انت تِھران ءَ شتیں . گرماگ ءِ موسم ات . من کلنڈیں ماشینکے پہ بھا زرت ءُ دیم پہ بلوچستان ءَ سر گپتیں. شیعیانی بنجا ہ قم ءِ شھر ءَ سر بوتیں . ھوا سک گرم ات . من پلاستیکی گالونے زرت ءُ چہ نلے ءَ آپ ایر ریچگءَ اتاں کہ نیمہ زاتیں جنینے زادیان ءُ پیداگ ات . آئی ءَ گوشت ; او سگ عمری افگان قم ءِ آپ ءَ نجس مکن . من بلوچی پچّ ءُ لباس ءَ اتاں . من پسّہ دات من افگانے نیاں , بلوچے اں . آئی ءَ گوشت زردیں کچک تولگ ءِ برات انت . بلوچ ءُ افگان دوئیں سگ عمری انت ءُ آجری کپّے چت ءُ منی نیمگ ءَ شیمشان بوت .من نیمشلونکیں گالون زُرت ءُ دھدرکائی ماشین ءَ سواربوتاں ,برو کہ نروے. جنینک ءَ آجر مئے نیمگ ءَ مانبُرّ ات . بلے ما دور شتگ اتین . آ اوشتات ءُ ھنچشیں زا ءُ بد دیگ ءَ ات کہ کچک آیاں بو نچنت

وھد گوزان بوت ءُ من درانڈیہ بوتاں . کتاب ءُ کتاب وانی منی بندری ھیل بوتگ . یورپ ءِ سر بیگ ءُ گیشتریں کتابوانی ءَ من سرپد بوتاں کہ قمی جنین ءِ بُگز ءُ کینگ چہ کجا بوتگ
وھدیکہ صفوی حکومت ءَ شیعہ پارس ءِ رسمی مذ ھب کت , سنیانی کشگ ءُ گاردیگ ءِ چن ءُ لانچ بنگیگ بوت . پیش ءَ سنّی مذھب اودان رسمی ات . ھمے ڈول ءَ کہ مروچی ملا خمینی ءِ حکومت کنگ ءَ انت. بزان ایران ءِ رکیّنگ ءُ دارگ گوں شیعہ ءَ ھمگرنچ انت.بلے من گوشاں کہ ایران ءِ پرشگ شیعہ ءُ سُنیءِ جنگ انت

نوں بیاات آ دور ءُ مروچگیں دور ءَ چمشا نکے دئیں.ءُ اوگان ءُ بلوچ ءِ چپالگوش ءِ پد ءَ شیعہ ءِ گوش بُن ءَ چاریں
شاہ سلتان حسین ءِدور ات ءُ اصفھان ءَ حکومتی کنگ ءَ ات ءُ سنیّ ءِ نام سگ عمری ات .ھما بے واھُندیں کچک
اوگاناں گوں بلوچانی ھمراھی ءَ کرمان گپت ءُ سرانڈیل کت ءُ دیم پہ اصفھان ءَ سر گپت انت کہ شاہ حسین ءِ شا ھی بنجاہ ات

اوگان ءُ بلوچاں رند چہ کرمان ءِ لگتمالی ءَ دیم پہ اصفھان ءَ سرگپت انت
بلوچ ءُ اوگاناں ھپت ماہ ءَ اصفھان انگِّر ءُ دورہ کت .چہ بھارگاہ ءِ اولی روچاں تا کہ جوپاگ ءِ میانجین ءَ. رو آ ءِ راہ اش بست انت کہ وراکی چیز ملک ءَ نہ رس ات.اصفھان ءِ مردم ورد وراکی چیزانی ایر کنگ ءِ ھیلدار نہ اتنت. چہ شاہ عباس اول ءِ دور ءُ باریگ ءَ ھمک چیز وھد ءُ موسم ءَ ھست ات.مردمانی دل ءَ ھر وھد ءَ لوٹتگ ات چہ بازار ءَ زرتگ ات.اودءِ مردماں چہ چیز ءِ بازی ءَ ڈُکّال ءِ نام نزانتگ ات.پھمیشاآیاں اصفھان ءِ انگِّرءُ آئی ءِ آسر ھنچنائیں گپّے زانتگ ات

حزین لاھیجی کہ وت ھموداں بوتگ ,آ گوشیت ھما سکّتریں وھد ءَ کہ یک نگنے پہ چار پنچ اشرفی ءَ بھا بوتگ مردماں یکدگر ءَ کمک کتگ ات.ءُ ھچکس چہ شد ءَ نمرتگ ات.بلے گوں ورد ءُ وراکی چیزانی ھلاس بیگ ءُ ڈکالّ ارش ءَ مرگ ءِ ساھگ ءَ شھر ساھیل کت

زبدہ التواریخ تاجر ءُ زرداریں مردے ءِ سرگوست ءَ نبیسیت ; کہ مردماں گمان کتگ ات آئی ءَ وتی لوگ ءَ گندم ءُ دگہ وراکی چیر داتگ , بلے راستی ءُ ھکیکت دگہ ڈولے ات.آ دپتر ءِ نبیسوک محمد محسن کہ وت بادشاہ ءِ کاردار ات کہ ھر کجا ٹپّتگیں چیز درگیتکگ ات نیمے پہ سرکار ءُ نیمے پہ بومہ ءُ پاسگاھانی سپاھیگاں برتگ ات نبیسیت: نقشینہ بھاکنوکیں مردے ءِ لوگ ءَ کہ میدان شاہ ءَ دکان ھست ات شتیں. چیر زمینی کوٹی یے ءَ کہ آئی ءِ دپ مانچتگ ات ءُ دپ پہ گِل دونتگ ات , ما گمان کتگ ات کہ وراکی چیز مان انت دروازگ پچ کت ءُ تھ ءَ شتیں . اوداں ما چاردہ ٹاھیں گوالگ دیست کہ ھر یکّے تبریزی ١٠٠ من ات کہ پھتگیں ھِشتی (آجر) بمبلُکانی سر ءَ ایرتنت ءُ آیانی چیر ھالیک ات.چہ تھاری ءَ ما گمان کتگ ات کہ گندم ءُ آرت اش مان انت.پہ وش ءُ شادانی آیانی دپ ءِ پچ کنگ ءَ گلائیش بوتیں. گشئے خیبر ءِ کلات ما گپتگ ات. بلے مئے دپ چو درتگیں بوٹاں پچ بوت انت کہ گوالگ چہ عباسی سکّہ ءُ زر ّءَ پرّ تنت پہ.ناکامیں دلے ءَ گوالگانی دپ پدا بست انت ءُ چہ اوداں در کپتیں. بھمانگی دگہ گپّے ایش ات کہ لوگ واھُند بے وردی ءُ شُد ءَ کشتگ ات ءُ ھچکس اوداں نہ ات کہ آئی ءَ کلّ ءُ گورّ بکنت

کروسنسکی نبیسیت : وھدیکہ اصفھان ءِ انگرّ ءَ شول کشّ ات ءُ دراج بوت مردم ھر ءُ ھشترءُ رند ءَ کچک ءُ گربگانی گوشت ءِ ورگ ءَ دلگوش بوت انت . رند چہ انگرّءَ تاکہ سے ٣ ماہءَ بازار ءُ چارسوق ءَ نگن ,گوشتءُ کمکلیرے وراکی ھست ات ٣ ماہ ءَ رند ھر ءُ ھشتر ءِ گوشت بھا بوت . چنت روچ ءَ رند ھر ءِ کیمت ٢۵ تمن ءَ رس ات .چنت روچ ءَ رند ھر ءِکیمت ۵٠ تمن ءَ سربوت. چنت روچ ءَ رند ھر ھلاس بوت انت.ءُ کچک ءُ گربگ ءِ باری رس ات. یک روچے چہ فرانس ءِ ایلچی ءِ لوگ ءِدرآتکآں ءُ بالیوز انگریز ءِ لوگ ءَ روگ ءَ اتاں ,آئی ءِ کمپان ءِ دپ ءَ جنینے دیست اوں کہ گربگے گپتگ ات ئے ءُ کشگ ءِ جھد ءَ ات .گربگ ءَ آئی ءِ دست دپ جتگ ات ءُ ٹپّی کتگ ات کیرّکار ءَ ات . من جنین کمک کت. آئی ءَ گربگ ھلار کت.رند ا باری پہ بنیادمانی گوشت ءَ رس ات. چار ماہ ءَ رند مردماں انسان ءِ گوشت ءِ ورگ بنگیج کت.پنچ قصّاب پہ اے کار ءَ دزّگٹ اتنت کہ مردم اش گپت انت ءُ آیانی سر اش پہ ڈوک چُپتءُ بھا کت انت. تازگیں مردگ اوں دیست کہ بازار ءَ آیانی ران اش بُرّات ءُ وارت انت.لھتے مردماں چہ اے وڑیں جاور ءِ گند گ ءَ وتکشی کت

لکھارت نبیسیت : شد ءَ ھنچو پلیر کشّتگ ات کہ وھدیکہ یکّے مرتگ ات ھما دمان ءَ مردماں آئی ءِ جان ءِ گرمیں گوشت برتّگ ات , بےواد ءُ مسالہ بے پچگ ءُ گرادگ ءَ وارتگ ات ءُ گندہ تر چہ اشی ءَھر دیں چُکّ ءُ ننک اش دُزّات ءُ کشت ءُ وارت انت

ءُ کروسینسکی شاھدی دنت کہ مردے چہ شاہ حسین ءِ کاتباں ھر چی ھست ات گوں لوگ ءِ مردماں وارت انتءُ دگہ چیزے پشت نکپتگ ات کہ وتءُلوگ ءِ مردمانی کشگ ءِ پگر ءَ کپت . گُڈّی وراک گراست ءُ آئی ءِ تھ ءَ زھر مان کت ءُ لوگ ءِ مردمان ءَ وارینتءُ ارس ریچان ءَ گوشت : منی آزیزاں اے مئے گڈّی وراک انت . منی اوپار نروت کہ شما چہ شد ءَ بازار ءُ تنکاں بکپ ات ءُپہ بزّگی ءُ واری بمر ات.دروازگ اش بند کت ءُ درست پرزونگ ءِ سر ءَ مرت انت

نبشتانکے چہ ھلندی شرکتے ءَ بنام ھند شرقی ءَ پشت کپتگ نبیسگ بوتگ چہ گرانی ءُ ڈُکاّل ءِ سبب ءَ ھمک روچ بازینے چہ مردماں مرگا انت. ھمک تنک ءُ مزن راھاں بازیں مردمانی جون کپتگ انت.جون ١٧٢٢ عیسائی, ١١٣۵ ھجری قمری

دراجیں کسہّ ایں من اشی ءَ گونڈ گراں . شاہ حسین ءَ سیاھیں پچ گورا کت ءُ بازار ءَ سینگ جت ءُ کوکار کت . اصفھان ءِ دروازگ پچ کت انت ءُ شاہ حسین ءَ وتی شاھی تاج محمود اوگان ءِسر ءَ دات
بلوچ ءُ اوگانان شاہ حسین کشت ھشت سال ءَ کرمان یزد اصفھان شیراز قم تھران ءُ قزوین ءَ بادشاھی کت . محمد حان بلوچ ءِ باروا من پیش ءَ گوشت

باستانی پاریزی وتی نبشتانکے ءَ نبیستگ داں ھما وھد ءَ اوگاناں بادشاھی کت کہ بلوچ گوں آیاں ھور اتنت. وھدیکہ بلوچاں آیانی ھمراھداری یلہ دات ءُ دیم پہ وتی وتن بلوچستان ءَ شت انت ,اوگان ءِ حکومتی ھلاس بوت
نوں بلوچستان ءَ شیعہ ءُ سنیّ ءِ جنگ جاری انت ءُ شیعہ بلوچانءَ سگ عمری گوشگ ءُ کشگ ءُ درنجگ ءَ انت . شاہ حسین ءِ نُکسہ مئے دیم ءَ انت .بلوچ ءِ شھمات ءِ توار انت ءُ شیعہ کشگ ءَ انت . گجرستان باریں پہ کجا سربیت .کباب ءِبو تالان انت ,باریں ھر داگ کنگ ءَ انت یا دگہ

علی رئیسی