محمد خان بلوچ ءُ ندرقلی چمّ کشّ

من وتی تاریخی ءُ دگہ نبشتانکاں مدام بلوچانی مجگاں سوھان کتگ ءُ راستیں ھبر گوشتگ کہ مروچگیں ایران رضا میرپنچ ءِ وھد ءَ جوڈینگ بوتگ تاکہ مروچگیں ورنا نسل چہ راستی ءُ درستی ءَ سھیگ ءُ سرپد
ببیت.پرچا کہ ایرانیاں دروگیں تاریخ پہ وت ءَ شوھاز کتگ ءُ نبیستگ

ایرانی یک مردکے ءِ سرءَ پھر بند انت کہ ایران ءِ مستریں بادشاہ بوتگ .بزاں نادرشاہ افشار . آ مردک نہ شاھے بوتگ ءُ نیکہ آئی ءَ پایتختءُ شاھی بنجاھے بوتگ. آ گنوک ءُ شدیگین ڈُنگ ءُ دزّے بوتگ

ھما وھداں کہ اوگان ءُ بلوچاں پارس ءِ صفوی حکومت ءُ بادشاہی چپی کت ءُ ھشت سال ءَ اوداں حکومتی کتگ ات , ندرقلیءَ خراسان ءِ ابیورد ءِ ملک ءَ وتی پت ءِ دکان ءَ پوست ناسی کتگ ات. آ وھداں ملکاں سیمسر ءُ ھدّات نبوتگ .ھرکس ءَ ملک ءُ کلّگے ءَ چپاول ءُ حکومتی کتگ.ھر کس ءِ زور گیشتر بوتگ ھما کلگ ءُ ملک ءِ مستر ءُ مھتر بوتگ . ندرقلی ءَ رمبے شُدیگیں مردم زُرت ءُ دُزّی ءَ دلگوش بوت .کاپلہ انی راہ بست ءُ پلپانچ کت ءُ چہ پت ءِ سوچن ءُ بندیکاں وت ءَ چُٹیّنت.آئی ءِ دُزّیں سنگت گیش بیان بوت انت

آ وھد ءَ شیراز ءَ محمد خان بلوچ حکومتی کنگ ءَ ات
مھدی استرآبادی کتاب تاریخ جھانگشای نادری ءَتاکدیم ٢٨٩ ءَ نبیستگ : گوں محمد خان بلوچ ءِ ھُکم ءَ ابوالفتح خان کہ پیش ءَ شوشتر ءِ حاکم بوتگ شوشتر ءِ کلات گپت. حویزہ ءِ شیخ ھم گوں آئی ءَ ھور بوت انت.کعبہ ءُ بنی تمیم ٹکّاں ھم گوں آئی ءَ ھور بوت انت ءُ دزفول اش وتی دست ءَ آورت

ندرقلی ءَ پہ محمد خان بلوچ کاگدے دیم دات کہ چو کہ من گند گَ اں تو بادشاہی ءِ واب ءَ گند گَ ئے ؟محمد خان ءَ پسّہ دات : وھدیکہ تو گوں دو سے ھزار افشار ءَ بادشاہ بیگ لوٹے , من کہ شست ۶٠ ھزار بلوچ ءِ سروکاں پرچا بادشاہی مکناں

نادر چمکشّ دیم پہ شوشتر ءَ آتک.ابوالفتح خان کشت ءُ شوشتر تاراج کت.ءُ گوں بیست چار ھزار سپاھیگ ءَ دیم پہ پارس ءَ شت کہ محمد خان بلوچ ءَ پروش بدنت. تھماسپ قلی چہ اصفھان ءُ اسماعیل خان خزیمہ چہ کھکیلویہ گوں آئی ءَ ھور بوت انت.محمد خان کہ شیراز ءِ حاکم ات گوں وتی پوج ءَ شولستان ءِ بند ءَ ندرقلی ءِ راہ بست. بازینے چہ ندرقلی ءِ سپاھیگان ءَ کشت ءُ دو ھزارچہ محمد خان ءِ تپنگی کشگ بوت انت.محمد خانءِ تپنگی ھما وھد ءَ کشگ بوت انت کہ شام ورگ ءَ اتنت

تھماسسپ قلی خان جلایر محمد خان ءِ رند ءَ کپت. محمد خان ھما شپ ءَ چہ باشت ءَ میمند ءِ راہ ءَ شیراز ءَ آتک وتی جنینان ءَ زرت چہ جھرم ءِ راہ ءَ دیم پہ لار ءَ سرگپت.جلایر شیراز ءَ آتک .شیراز ءِ کلات ءِ بلوچ ءُ اوگانیں نگھپاناں کلات آئی ءِ دست ءَ دات .ءُ آئی ءَ قاسم بیگ ءُ احمد سلتان کہ محمد خان ءَ بندیگ کتگ اتنت آزات کت انت
وھدیکہ محمد خان لار ءِ نزیک ءَ رس اِت یحیی خان بلوچ لار ءَ دیم دات کہ اودءِ مردم آئی ءِ پشداری ءَ بکن انت. کلات ءِ کوٹوال ءَ یحیی خان گوں ھمراھاں گپت ءُ بندیگ کت.محمد خان ناچار بوت کہ دیم پہ گرمسیر ءَ بروت. تھماسب قلی جلایر لار ءَ سربوت ءُ یحیی خان گوں ھمراھاں کشت

بیست شش شابان ءَ ندرقلی شیراز ءَ سر بوت . آئی اش ڈاہ دات کہ محمدخان گرمسیر ءَ رستگ
ندر قلی ءَ پہ تھماسب قلی پیگام دیم دات کہ وتی پوج ءَ فسا ءُ جھرم ءَ بِلّیت ءُ وت شیراز ءَ بیئت .تھماسب قلی ١٨ رمضان ءَ شیراز ءَ آتک ءُ آئی گوشت کہ پہ محمد خان ءُ احمد مدنی ءِ کوش ءَ وت ءَ تیار بکنت

سال ١١۴٧ قمری ءَ اے ھال پاشک بوت کہ تھماسب قلی ءَ خُنج ءُ عوض ءِ عربانی کلات گپتگ انت ءُ کمشک ءِ کلات دورہ کتگ. اوداں احمد مدنی ءِ حکمرانی ات, سیمقانی عربءُ اوگان آئی ءِ سپاھیگ اتنت.محمد خان بلوچ کہ دشت ءِ کلات ءَ ات چہ اےکار ءَ سھیگ بوت, آ پہ احمد مدنی ءِ کمک ءَ درآتک ءُ گوں ۵٠٠ مردم ءَ احمد ءِ کلات ءِ یک فرسخی ءَ اردو کت .تھماسب قلی گوں سپاھیگاں محمد خان ءِ نیمگ ءَ آتک ءُ بازیں سپاھیگ کلات ءِ چپ چاگرد ءَ ھشت . چہ دوئیں نیمگاں بازینے کشگ بوت ءُ محمد خان دیم پہ تیاب ءَ شت

شیخ احمد مدنی گوں کلات ءِ درستیں مردماں دزگِر کنگ بوتء ُ دیم پہ ندر قلی ءَ دیم دات انت کہ پھکان ءَ کشت
محمد خان بلوچ بوجیگے ءَ سوار بوتءُ جزیرہ قیس ءَ شت کہ اودءِ حاکم ھولہ ءِ عرب اتنت. ( قیس مروچگیں کیش ) انت

شیخ عراق ولد شیخ راشد کہ ھولہ ءِ پاگواجہ ات محمد خان گوں ھمراھاں نیم شپ ءَ ماں واب ءَ دزگر کت ءُ آسنین کپسے ءَ کت ءُاصفھان ءَ دیم دات. ندرقلی ءَ آئی ءِ بندیگ کتگیں مردم یلہ دات انت ءُ بازیں مال ءُ بکشیش آئی ءَ دات
محمد خان اصفھان ءِ عالی قاپو ءَ یارگ بوت ءُھموداں ندر قلی ءِ دیم پہ دیم ءَ آئی ءِ چمّ اش کشّ اتنت.ءُ بندیگ کت. محمد خان ءَ گوں بندیجاہ ءِ پانکپان ءَ گوشت کہ ھنجرے پہ آئی ءَ بیاریت . آ مرد ءَ ھنجرے وراکانی چیر ءَ کت ءُ بُرت. بندیگی ءِ سیمی شپ ات کہ محمدخان ءَ گوں ھما ھنجر ءَ وت ءَ کشت

نوں پہ اشکن ات دُّز ءُ مآلوار ءُ گنوکیں ندر قلی ءِ آسر ءُ تِرّ ءِ پد ءَ . آ مدام تچان پلپانچ کنان ءُ چمّ کشان ات کہ جنگلےءَ تیرے آئی ءِ گوش ءِ گور ءَ گوست . آئی ءَ شک کت کہ تیر آئی ءِ وتی بچ رضا قلی میرزا ءَ جتگ . وتی بچّ ءِ چمّ کشّتنت. نیم ساھت ءَ رند ھما دیوان ءِ درستیں نندوکانی چمّ کشّتنت کہ شما پرچا من ءَ نگشتگ کہ وتی بچّ ءِ چماں مہ کشاں .شما منءَ گِر ءُ دار بکتیں. چہ آ روچ ءَ رند چو ھڑّکئی کچک ءَ بوت

سال ١١۶٠ ھجری قمری ءَ یک شپے ءَ گوں وتی دزءُ ڈُنگیں سنگتاں قوچان ءِ دمگ ءَ شراب واری کت .آ دیوان ءَ کند کچول بوت .آئی ءِ سنگتاں ھور گوں آئی ءَ کند ات .ڈُنگانی پاگواجہ زھر گپت ءُ گوشتی شما منی دیم ءَکند ات باندات روٹک ّ ءَ من شمے راہ ءَ روشن کنان . آ سرپد بوت انت کہ گنوک ءِ ھمراھداری بسّ انت. گوں صالح خان افشارءِ سروکی ءَ ھما شپ ءَ چنت کس آئی ءِ تمبو ءَ پترتنت ءُ وشرنگیں ھندی جن ءِ کش ءَ آئی ءِ لنگ تاب دات انت ءُ گوں تیزیں تپرزینے ءَ آئی ءِ سر گڈّ ات

ایش ات بلوچیں سے تپنگدارانی; گلآم رضا حسین بُرّ, دکتر دشکی ءُ ملک توکی ءِ ھیرو

چہ آ واجھان دزبندی انت کہ چہ گریواسکیں شاہ ءِ بچلک ءِ رند ءَ بترّانت ءُ بلوچی ءِ مادنیں کشک ءَ بیاینت
ھرکس مان وتی آبند ءَ چوش انت کہ گروک ماں بند ءَ
سرمچار ءُ بھادرّیں محمد خان بلوچ ءِ یات زندگ بات

١۵ مئی ٢٠٠٩ علی رئیسی
.....................................................................................................................
پوستناس : پوست ءِ ناسینوک . ھما مردم کہ پوست رنگ کن انت .پوستان گوازاں ءُ رنگ کن انت, رند ءَ کوش ءُ پوستی جُبّہ ءُ کلاہ دوچنت.