ایران اوگانستان ءُ عراق نہ انت ؟؟

اگاں اے جست ءَ چہ ایرانی شپانک یا شش ھپت سالی چُکّے ءَ بکن ئے .آ پسہّ دنت کہ ھو اداں ایران انت ءُ عرآق ءُ اوگانستان نہ انت

منی اے گپّ ءِ مراد ایش انت مروچاں ھما ایرانی کہ ایرانی ملاّیانی چانیگ وار انت ءُ ملایانی ھارت ءُ پورتاں اشکن انت,ءُ لھتے ڈنّ چہ ایران ءَ ملایانی دزبوج ءُ گلام انت ھم ھنچش گوش انت کہ اگاں امریکہ ایران ءِ سر ءَ اُرُش بکنت,ایرانی مھلوک امریکہ ءَ نیست ءُ نابود کن انت. من گوشاں پُشّ . پُشّ ھُد ھُد ءِ تُسّ ءِ توار ءَ گوش انت
من ھما یک دو بلوچاں گوشاں کہ یورپ ءَ نندوک انت ءُ ایران ءِ سُرنا دپ ءَ اںت . چہ ایرانیانی ترس ءَ سرڈھور ءُ درانڈیہ انت ,ءُ وت ءَ ایرانی گوش انت ,ءُ پہ ایران دوستی ءَ چہ پارسیاں دیما تر انت پہ .پارسی زبان ءَ کاسہ داگ تر ازآش اند

بلوچی ءَ گوش انت : مات ءَ نہ سُھت ماتوءَ سُھت. اے ھما بزگّیں بلوچ انت کہ انترنت ءُ پالتاکاں ,وتی وبلاگاں ,امریکہ ءُ اسرائیل ءِ رادیو تی وی ءَ پہ چار ڈالر ءَ گپّ ءُ ترآن کن انت ءُ وت ءَ بلوچانی نمایندہ ءُ جھگیر گوش انت . وتی چمّاں پچّ بکن انت ءُ دینا ءِ تاریخ ءُ راجدپتر ءَ بچار انت . پہ چار ڈالر ءَ شدیگیں پس ءِ ڈول ءَ پارسیانی رند ءَ مہ پیک انت ءُ مہ دود انت

دلگوش بدارانت :اولی جھانی جنگ ءِ وھد ءَ کہ دنیاءِ مسترءُ کماش انگریز ات ءُ عثمانی حکومت ءَ پروش وارتگ ات , انگریذ ءَ لوٹ ات کہ یک عربی مزنیں ملکے بجوڈین ایت . تھنا بگداد ءَ ھشتاد ھزار انگریز بگدادیاں کشت . گڈا انگریز ءَ حکومت آل سعود, کویت , عراق ءُ رند ترءِ امارات ,قتر ,بحرین جوڈینت

ھما دوران ءَ انگریز ءَ مزنیں لشکرے پہ اوگانانی گلام کنگ ءَ قندھار ءَ دیم دات .چہ آ لشکر ءَ تھنا یک مردمے پشت کپت کہ کشتگینانی ھال ءَ بہ بارت. اوگان ءُ روس ءِ جنگ ھچ کس ءَ نشمُشتگ.امریکہ ءُ آئی ءِ سنگتان گوں صدّام ءَ گوشت دانکہ سے روچ ءَ چہ عراق ءَ در کپ .صدام ءَ پسِّہ دات من عراق ءَ پیداگ بوتگان ءُ عراق ءَ مراں ءُ ھنچش ھم بوت .بگداد ءِ تاریخ ھزاراں سال گوں ھون ءَ نبیسگ بوتگ

نوں بیاات گجر ءِ تاریخ ءَ چمشانکے دئین

پارس ءِ حکومت شیراز ءُ صفویانی وھد ءَ اصفھان بوتگ ,آ ھم ترک ءُ قشقآئی ءُ لر بوتگ انت. صفوی شاھ حسینءِ حکومت دہ ھزار اوگان ءُ بلوچ ءَ چپّی کت ءُ ھشت سال ءَ اشرف ءُ محمود اوگان ءَ اسفھان ,شیراز ءُ تھران ءَ حکومتی کت . محمد خان بلوچ آ رمب ءَ ھور بوتگ . محمد خان بلوچ ءِ جنگ ءُ چوپ گوں پوزناسیں ندر قلی (نادر شاہ ) ءَ تاریخ ءِ مزنین چیدگے .اے بار وءَ من دگہ وھدے گپّ کناں

پیش چہ اسلام ءَ پاسارگاد ءَ رُمبُکے آس پرست ءُ مجوس ھست ات بزان زردشتی ءُ آ رمب ءِ مردمانی مال ءُ مڈّ ی , عزّت ءُناموس آس پرستیں ملّا بزاں مُگانی دست ءَ ات.عُمر ءَ مگانی تاسانٹِّلو ھلاس کت ءُ کشت انت . رمبُکے دیم پہ ھندوستان ءَ تتک ءُ شت انت. مروچگیں ایران چنت کرن ءَ عرب ,اوگان ,سلتان محمود , چنگیز ءُ تیمور لنگ ءِ پادانی چیرءَ بوتگ

انگریز ءَ رضا رضاشاہ کت ءُ ھنوگیں ایران جوڈینت . وھدیکہ دومی جھانی جنگ ءَ رضاشاہ ءَ ھیتلر ءِ پُشتداری کت , روس ءُ انگریز ءَ گربگ دو بھر کت . بی بی سی ءَ تھنا یک ھپتگے ءَ وتی دپ ایران ءِ نیمگ ءَ ترّینت , رضاشاہ دُزّ ءُ مالوار بوت .ھما آسنین مرد ءَ یک تیرے ھم نسراپینت . انگریز ءَ گپت ءُ لانچُکے ءَ سوار کت ,جزیرہ موریس ءُ افریکہ ءَ دور دات , ھموداں پہ روسیاھی ءُ چِنّہئی ءَ مرت . محمد رضا محمد رضاشاہ کت. محمد رضاشاہ ءِ وھد ءَ ایران ءِ مستر ءُ جھل ءُ برز کنوک امریکہ بوت

محمد رضاشاہ ءِ تاچینگ ءِ وھد ءَ امریکہ ءُ انگریز ءِ سفیراں وتی دست ءِ ساھت چارتنت بزاں تئی درکپگ ءِ وھد انت . آگوں گریتگیں چماں وتی بچک ءُ کُچِک زرتنت ءُ گریوان ءَ دیم پہ مراکش ءَ جھت شت.آئی ءِ ارتش ءَ کہ دنیا ءِ پنچمی پوج ات گیتے آئی ءِ دیم ءَ مُشت
ملّا خمینی مگربی ملکاں چہ عراق ءَ بڈّءَ جت ءُ پاریس ءَ برت. سوپ ءِ چیر ءَ نندینت , سرسوج کت , شیعہ مزھب ءِ بنیا دءَ پرانسیسی بالیگرابے ءَ سوار کت ءُ تھران ءَ آورت ءُ گوشت اش بختیار مُرگ توپان نَھنت, کاگدی سئیچکیں . بختیار تتک ءُ شُت ءُ ملاّ خمینی ھوڈیں ایرانیانی پاگواجہ کت

مروچی کہ لنگیں خامنہ ای ,بے ریشیں ملا رفسنجانی, دراج گوشیں خاتمی ءُ شادی ایں احمدی نجاد کوریں ایرانیانی پاگواجہ ءُ پیشونک انت باریں تانکدی اے تاسانٹِلو ءُ خیمہ شب بازی دیم ءَ روت . بلے اے گپّ گوشگی انت کہ ھر وھد ءَ بی بی سی ءَ وتی دپ ملایانی ھلاپ ءَ پچلکوشت ,ھوڈیں ایرانی ھما نیمگ ءَ چھر ور انت کہ تاسانٹِلو ءِ بند یک ھما نیمگ ءَ آیان ءَ چھر بدنت

دنیاءِ سرمچار ءُ بھادرّں بلوچاں دنیا بدل بیان انت. روس پرشت ءُ شُت . یوگسلاوی چنت کشور بوت . دگہ بازیں ملک جوڈ بوت . پہ وتی ماتیں وتن بلوچستان ءِ آزاتی ءَ پاد بیا اِت . بلوچان ءَ گوں آزاتی لوٹوکیں آزری ,کرد ,ترکمن ءُ عربان ءُھمے پیم گوں رودرآتکی بلوچان ھور ءُ تپاک بیگ لوٹیت

ھما مردم کہ گوش انت ایران اوگانستان ءُ عراق نہ انت شّر گوش انت. من اے سئیں ملکانی بارو ءَ گپُّکے گوں شما گوشت. رند ءَ اے بارو ءَ گیشتر گپ رپ کنیں

ھما بلوچاںءَ کہ پارسی ءُ پنجاپیانی چانیگ وار انت رسوا بکن ات

علی رئیسی