لچی داسی پروفیسر

لچی داسی پروفیسر

پروفیسر مزارءَ لچےبڈّءَاتءُچہ مچکدگءَ دیم پہ میتگ ءُھلکءَ پیداگ ات٠ لچ چہ مچّی لٹّکّ ءُسیاھیں بٹّاگاں کوٹان ءُ پرّات ٠
مزارءِ دیم پہ دیمءَ پارسی جنکے پہ مچکدگءِ سیلءُ گردشءَ کرآم کنانءُ ملآّن ات٠ آ دو ھپتگ پیش پہ جنکانی وانینگءَ آ کلّگءَ آتکگ ات٠
مچکدگءُمیتگءِمیانءَدویینان ڈیک وارت٠ جنکءَ گوشت او لچی داسی کمّے اوشت منءَ گوں توگپّے حست٠
پروفیسرمزار کہ وتی یک ءُ دوانی تھءَ ات چہ وتی وھم ءُ ھیالءِ زرءَ پچ درھِتءُ آییءِ چنت کدمیءَ اوشتات٠ بگش ترا منیگی چے کارے کپتگ؟
جنکءَ پسّہ دات: مآن اے کلگّءِ جنکانی وانینوکان , ترا جنکے ھست انت کہ چہ منءَ سبک زورگءَ انت؟
ھو مھگلین منی جنک انت کہ تیی گورا وانگءُ سبک زورگءَ انت٠
وانینوکءَ گوشت: تیی جنک وتی سبک ءُدرونتءَ شّر پُھتہ ءُ شیوار نہ انت٠ آییءَ لُوگءَ رھشونی ءُ مدتءِ زلُورت انت٠ بلے چو کہ من تیی لچ ءُ داس ءُ لٹّکآں گنداں پہ منی گمان ءَ منی گشگ بے سوت انت٠ بوت کنت تو وت وانگ ءُ نبیسگ نزانے٠ آییءَ وتی چّم گوں درآتکگیں ٹیلگاں مزارءِ پرشتگیں چمّاں میڑینت انت ءُ پہ زھرکنی ءَ گوشت : تو سرپدۓ من چہ کتام دمگءَ رمبینتگ ءُ اداں آتکگاں ؟ من وتی پتءُ مات ,گحار, دوست,آزیزءُ وتی ورناییں وستار وشّ آپءُ ھواءُ وشّ زیدیں اصفھان ءَ یلہ داتگ انتءُ پہ شمے جنکانی انسان کنگ ءُ وانینگ ءَ اے سوتکگیں ڈّنءُ کوھاں ترّپی جنان آں٠ چو کہ من گنداں شما بلوچ تا کہ کیامت ءَ شّر نہ بیت٠ مردم دانکہ مہ وانیت شِّرءُ شِر ءَ گیشینت نکنت٠ دُنیاِءِ مردم پہ کجا سربُوتگ انتءُشمے مالءُ متاھ اے لچ ءُ داس انت٠ من ھمے پگرءَان کہ اے لچ ءُ داس بارین کدین چہ بلوچءِ دمبءَ جتا ءُ گستاھ بینت٠ ھدا وت پہ شما توجیلے بسازایت٠

پروفیسر مزارءَ سر سرینتءُ پسّہ دات: منءَ اجازت دئے جستے چہ ترا بکناں؟
ھو من پہ تئی جستءِ پسہ دیگءَ تیاراں بگش٠
منی اولی جست : تو چنچک وانتگ ؟
من ٩ کلاس وانتگ ءُ دو سالءَ وانینوکی ھیلداری بزاں تیچر ترینینگ ھم وانتگ اوں٠ پارسی کمانمیانیں جنکءَ وتی تنکّیں لنٹ پہ تژن جھل ءُ برز کت انت ءُ سینگءِ درنگ ءُ مکّیں ھنارانءَ جمبینت ءُ گوشت: پارسیءَ گشئے چہ منءَ شرترگپّ کنئے, دگہ بگش , چے گشئے؟

منی پآرسی گپّ جنگءَ بسوچ٠ من وتی لچ ءُ داسءِ کسّہءَ

گوں تو کاراں٠

ھما وھداں کہ من کسان اتاں,ءُ بنگیجییءَ ھمے کلّگءَ وانگءَ اتاں,وانگءَ رند ,آدینگءِ روچاں پتءَ منءَ ھردکیں لچکے داتگ ات کہ من دارءُ کاھ چتگ ات ءُوتی پت باگءِ کاراں کمکءُ مدت کتگ ات٠ بلے وھدیکہ منی سر شمئے مزنیں ملکءُ شھران کپت, ءُ دانشگاھءَ سربوتاںءُ درستیں ایرانءَ اولی نمبرءَ پاس بوتاں, گڈا آ ھردیں لچک پہ بِھ شمشت٠ نزاناں باریں ریزاِت یا کہ کسےءَ زمستانی سارتین شپےءَ سوتکءُ دمانےءَ وتی دست تاپینتءُ گرم کت انت٠

پیش چہ ملّا خمینیءِ آشوب,جھکابوستءُسّردورءَ من چنت سالاں زاھدانءِ دانشگاہءَ استادءُ پروفیسربوتگاں٠ منی بازیں شاگرد دنیاءُ ایرانءِ کنڈکنڈءَ شنگ انتءُ مزنیں کارانی واھند انت٠ نوں تو چہ ھما سیاھپاگءُ اسپیت پاگیں ملایاں جست بکن کہ منی میارءُ گناہ چےات کہ من اش چہ کارءَ کشّ ات٠ اگاں من گنھکاریے اتان پرچا من اش دادگاھی نکت.

او منی جنک ءِ پھتہءُ شیوارین وانینوک گوشدار نون من ترا گوشان من تھنا پہ اے ھاترا کہ بلوچے اتان ءُ سیاستءِ پڑ ءَ پی اچ دی کتگ اتءُ شاہءِ زمانگءَ کارءَ بوتگاں ھچّ توءُ ھچّ ما٠٠٠!!
شاہءَ ھم پہ ما بلوچاں مزنین شندءُ زھمے نجتگ٠ آئیءِ پارسی کچکءُ گربگانی کتابان منءَ چہ ھردین لچکءَ جتا کتءُ ملا خمینیءِ اسلامی رھبندءُ اَ اِ اُ بَ بِ بُ ءَ ھنچو کہ گندگا ۓ اے جگناتءُ مزنین لچ منی بڈّءَ داتگ٠
من تئی آدگہ جستءِ پسہءَ ھم دیاں کہ گون منی جنکءِ وانگءَ ھمگرنچ انت٠

منی جنک گندگءَ انت کہ منی زند پیشءَ چون بوتگءُ ھنوں چون گوزگءَ انت٠ پہ منی گمانءَ آ نکش گریءُ بلوچی گُد دوچیءِ کارءَ چہ وانگءَ گیشتر واھگدار انت٠ اے ڈولین پنتءُ سوجان منی دولین کچ کشّےءَ مگش! برو ھنچشینے شوھاز کنءُ پاترپ بدئے کہ سیاہءُ اسپیتءِ پرک مہ زانت٠ من ایرانیانی پندلءُ رپکءَ شرّ زانگا آن٠ اے پارسیانی تیزین تپر انت کہ پہ بلوچی زبانءِ گُدّگ ءُ ولگوج کنگءَ بلوچین جنکانی دستءَ داتگ اش٬ وھدیہ کہ آ مات بینت گون وتی چُکان پارسی گپ جن انت٠ پارسی وان انتءُ نبیس انت٬ ھنچو کہ پنجاپ٬ بندرعباس٬ جبال بارزءُ بشکردءِ بلوچ بوتگ انت٠ بلوچین جنک بلوچی زبانءَ گون پارسیءِ تیزین تپرءَ وت گدّ ان٠
مزارءَ لچ برزادی کجّ اتءُ گوشت پہ رُکست ئے کہ منی بار گران انتءُ من گیشتر اوشتات نکناں٠
دہ پانزدہ گام ءَ کہ دیمءَ شت٬ اوشتاتءُ چکّ ئے جتءُ چارت٠پارسی وشچاملین وانینوک ھشکءُ ھیران انگتءَ وتی جاہءَ اوشتاتگ اتءُ گون ھُرّگین دپءَ آئیءَ چارگءَ ات٠